Ххувшаврил кьинилун хас бувну, гьарца шинал, чIявусса гьур­ттучитал ва тамашачиталгу бавтIун, Гъумук шайссар спорт­рал бяст-ччаллу. Гьашину миннуй гьуртту хьунни Ккуллал райондалияссагу.Бяст-ччаллу сакин бувну бия Лакрал райондалул администрациялул жагьилтурал иширттал, спортрал ва туризмалул отделданул. 

Ххяххан бунни дучри

Гъумучиял сельсоветрал завалунсса дучри ххяххан баврил бяст-ччаллий гьуртту хьунни мяйва чу. Ххув хьунни Мукьардал балчан, кIилчинмур ва шамилчинмур кIанттурду бувгьунни Ккуллал дучрал. Ххув хьуминнан ва хьхьичIунсса кIанттурду бувгьуминнан бахшишру дуллунни Гъумучиял шяраваллил администрациялул бакIчи МахIаммад ХIусниевлул.

Дирхьунни ка

Ка дишаврил бяст-ччалливух гьуртту хьунни 18 инсан. Ххув хьунни ХIажиев Зураб (Хъунайми). КIилчинмур кIану бувгьунни Шамххалов Оьмардул (Ккул), шамилчинмур кIану – Бариев МухIаммад-Маннардул (Хьур).

Лирчунни пут

Шикку гьуртту хьунни 19 инсан. Цалчинмур кIану бувгьунни Рамазанов МахIаммадлул (Щар), кIилчинмур кIану бувгьунни  Аллаев МахIмудлул (Ккул), шамилчинмур кIану — Ибрагьимов АьвдурахIимлул (ЧIурттащи).

КIункIу дурунни алхъан

Микку гьуртту хьунни ххю-ххюя инсанная сакин хьусса ряхра команда. Ххув хьунни Гъумучиял мизитрал команда, кIилчинмур кIану бувгьунни Аьрасатнал МВД-лул «Лакский» МО-лул командалул, шамилчинмур кIану – Ккуллал райондалул командалул.

Бувккунни волейболданий

Ххув хьунни ЧIурттащиял команда, кIилчинмур кIану бувгьунни Хъунайннал командалул, шамилчинмур кIану – Гъази-Гъумучиял ветерантурал командалул.
ХьхьичIунсса кIанттурду бувгьусса командарттан буллунни Лак­рал райондалул администрациялул чулухасса дипломру, сувенирду ва арцуйнусса бахшишру. Хасъсса бахшишру дуллунни ялагу Кьурбанов Маратлун (ЧIурттащиял команда) – «Яла итххявхма укку» хIисаврай,
Аьшаев Расуллун (Хъунайннал команда) – «Тамашачитуран яла даши ивзма» хIисаврай, ТIагьиров МахIаммадлун (ГьунчIукьатIрал команда) – «Ухгу хъанай ивкIун, ххув хьума» хIисаврай.

ХIадур бувссар
Зулайхат Тахакьаевал