ОьрчIру буруччаврил кьини хъуннасса шадлугъ хьунни цIуминалий тIивтIусса «Солнышко» тIисса оьрчIал садикрай.
Ва шадлугърай гьуртту хьун, оьрчIругу, нину-ппугу байрандалущал барча бан бувкIун бия ЦIуссалакрал райондалул администрациялулхъунаманал хъиривчу Алик Исрапилов,Чапаевкаллал шяраваллил администрациялул бакIчи МахIаммадпаша Аьбдуллаев, ЦIуссалакрал райондалул КIулшивуртту дулаврил управлениялул методист Мисиду Шагьмандарова.
«Солнышко» тIисса садик хьунни цIуссаминалий ЦIуссалакрал оьрчIан тIивтIусса цалчинсса садик. Гьашину ва садик зий бартлаглагиссар ца шин. Уттизаманнул тIалавшиннардай бувсса, цинярдагу шартIру дузал дурсса ва эмаратсса садик ххуйсса бахшишну хьунни цIуминалийн бивзсса кулпатирттан. Укун лавайсса даражалул садик хIакьину шагьрурдайгума нажагьсса бур. ХIакьинусса кьини садикравун занай бур 200 оьрчI, шиву бур 8 группа. ОьрчIащал зий ур 34 зузала.
«Солнышко» садикрай каялувшиву дуллай бур зун гъирагу, гьавасгу бусса жагьилсса пишакар Оксана Юсуповна. ЧIирисса чIумул мутталий ванил диялсса давурттив дунни оьрчIащал, миннал нитти-буттащал ва цалва зузалтращал. Шиккува кIицI лаган, садикраву тIивтIуну бур оьрчIан хьхьичIазаманнул багьу-бизу ккаккан буллалисса ххаллилсса музей.
Ва байрангу садикрай лавайсса даражалий хIадур дурну дия. Дурурххуну дия оьрчIан авурсса гузмарду, чиллу-чухъри, лавсун бия къутта кьяпри.
ОьрчIру буруччаврил кьинилун хас дурсса байран дайдихьлай, оьрчIругу, бувкIсса хъамалгу барча бунни садикрал хъунмур Оксана Юсуповнал. Байрандалун хасну чIюлу дурсса хIаятраву шиккун заназисса оьрчIал ккаккан бунни цалва гьунарду. Цуксса хъуннасса къулагъас дуллай бурив садикирттай оьрчIах, цуксса гьуртту хъанай бурив ми укунсса шадлугъирттай, муксса итххяххайссар оьрчIру.
Ва кьинисса шадлугърайгу му зат исват хъанай бия. Шиккун заназисса оьрчIру буниялагу гьунарду чIявусса оьрчIру бия. Цалва оьрмулуха къалавхьхьуну, вайннал хъинну пасихIну бувккунни шеърирду, увкунни балайрду, ккаккан дунни личIи-личIисса къавтIавуртту.
Шадлугъ къуртал хьуну махъ оьрчIру лагма лавгуна нацIу-кьацIулул ссупралухун.
А. Аьбдуллаева,
И. Саидова.
