Лакрал райондалул администрациялул бакIчи Абакар Къюннуев гьуртту хьунни ГумбатIуллал райондалий МихилтIиял шяраву хьусса «Обеление экономики» проектран хас дурсса экономикалул министр Раюдин Юсуповлул совещаниялий.
Зулайхат Тахакьаева
Муний гьуртту хьунни ДР-лул Халкьуннал Мажлисрал хъунаманал хъиривчу СяидахIмад АхIмадов, зунттал районнал каялувчитал, экономикалул отделлал каялувчитал, налогирттал инспекциялул ва кадастрданул палаталул зузалт.
Дагъусттаннал экономикалул хIакьинусса тагьардания буслай, Раюдин Юсуповлул кIицI лавгунни билаятрайсса кризисрал тагьардануцIун бавхIуну, багьлай бушиву кризис дайдишиннин хьхьичIра диркIсса экономикалул ккаккияртту дуруччин. Мукунсса мурад билаятрал гьарцагу субъектирдал хьхьичI бивхьуну бур паччахIлугърал БакIчинал. Зунттал районнай экономикалул ккаккияртту шяраваллил хозяйствалия дучIаймунийн хъар хъанай душиву кIицI лаглай, районнал каялувчитурая тIалав бунни кIанттул бюджетравун дучIаймур лахъ дан, детсадирттансса, школарттансса ва больницардансса дукия (дикI, нагь, нис, нувщи) кIанттул производительтураща ласлан. Хъирив ванал бувсунни районнал экономикалул ккаккиярттая, налогру датIаврия, аьрщи зузи даврия, объектру дуллалаврия.
Абакар Къюннуевлул бувсунни гьашинусса шинал 9 зурул мутталий агьалиная налогру датIаврил план щаллуну биттур дуршиву: аьрщарал налог — 109, 8 процентрал; госпошлина – 174 %. Ванал ялагу бувсунни гьарца шяраву, дазурду рирщуну махъ, агьалиначIа душиву 4707 участок, кадастрданул къуллугърал сияхIрайн ларсун, тIурча, дусса дур 7 азаруннияр ххисса участокру, яни 40 азарда гектарданун кIанттай кадастрданул сияхIрай дусса дур 123 азарда гектар.
Совещаниялул жям дуллай, ДР-лул Халкьуннал Мажлисрал хъунаманал хъиривчу СяидахIмад АхIмадовлул районнал каялувчитурая тIалав дунни «Обеление экономики» проект зузи баврих дагьайсса къулагъас дуллалаву.
