Вай гьантрай ЦIуссалакрал КЦСОН-далул къатраву хьунни хъаннил байрандалун хас бувсса мажлис.
ЦIуминалийсса ЦIуссалакрал КЦСОН-далул (Комлексный центр социального обслуживания населения) дуллалисса ххаллилссадавурттая жу уттинингу чивчуссия. Центрданул зузалт хъунмасса хIарачат буллай бур цайнма хъарсса кулпатирттах ххишаласса аякьагу, къуллугъгу бувну, ми рязий бан. ХIакьинусса кьини Центрданул аякьалий бур къушлий мушакъатсса инсан усса 74 кулпат, цIуллу-сагъшиврул ссуссукьушиву дусса 420 оьрчI. Вайксса инсантураха къуллугъ бан, ми рязи бан, гьай-гьай, къабигьар. Аммарив центрданул зузалтрал даврия рязи бакъасса цавагу кулпат бакъар. Гьарица кьинисса къайгъурдая къатIурчагума, Центрданул зузалтрал, цала каши диял къахъанахъисса чIумал, хъирив бувккун, ка-кумаг банма, чIарав ацIанмагу лявкъуну, ххаллилсса байранну дувай цала аякьалулун лавсъсса инсантуран.
Вай гьантрайгу Центрданул къатравун хъаннил байрандалун хас бувсса мажлисрайн оьвкуну бия чIявусса оьрчIру бусса ва цIуллу-сагъшиврул ссуссукьусса оьрчIру ябуллалисса ниттихъайн. БувчIлай бур вай ниттихъан бигьану бакъашиву, миннан цала оьрчIру ччаннай бацIан бан хъунмасса захIмат бан багьлай бушиву. ОьрчIру тарбия баврил даву укуннагу бигьасса дакъар, вай ниттихъаннив ххишаласса ссавургу, яхIгу бан багьлай бур. Укунсса кулпатру бусса ниттихъал дакIру цахъи дунугу тирх учин дан хъунмасса хIарачат бувну бия Центрданул зузалтрал.
Байрандалун хасну чIюлу бувну бия зал, кьинибархан тIий бия ниттихъахасса балайрду, тIивтIуну бия авадансса ссупра. Гьар мудан кунма, усттарну бачин бувну бия байрандалул мажлис Центрданул зузала Милана Адамова.
Мажлис тIитIлай, ванил балжину бувсуна Хъаннил байрандалул тарихрая.
Хъирив цIуллу-сагъшиврул ссуссукьусса оьрчIру ябуллалисса ниттихъан маслихIатру буллалисса ихтилат бунни социал педагог Умамат ХIусмановал. Ванил бавчIунни ниттихъайх цила хIадур бувсса мюнпатсса маслихIатирттащалсса буклетру. Шикку бур чаннал ссуссукьушиву дусса, чIу ххуйну къабаллалисса, кару-ччанну къазузисса оьрчIащал цукун зун аьркинссарив, ми, цIунцIия къахьун, цукун мюхчан банссарив, заралсса информациялия цукун арх банссарив бувчIин буллалисса маслихIатру. Ниттихъаха яла ххуй-ххуйми махъру шеърирдайну ва балайрдайну увкунни дуклаки оьрчIал.
Ниттихъул барча буллай, ихтилат бунни КЦСОН-далул хъунаманал хъиривчу Аьбидат Аьбдуллаевал, ххаллилсса балайрду увкунни Даниял Шабановлул ва Центрданул зузала Аьйшат Иркуевал.
Мажлисрал байлитIулий Центрданул чулухасса арцуйнусса бахшишру дуллунни ниттихъахьхьун мунил каялувчи Шахризада Сайпуллаевал.
Хьунни байран лавайсса даражалий, тяхъану, шадну, цинявппа кувнная кув рязину.
А. Аьбдуллаева
И. Саидова
