Лавгсса номерданий бувсун буссия цIуну увчIусса Гъумучиял шяраваллил бакIчи МахIаммад ХIусниевлул сипталийну райцентрданул базаллуву ва мунил лагма-ялттусса кIанттурдай хъуннасса субботник дуршиву ва миккува баян бувну буссия ирглийсса субботник дан дакIний бушиву шяраваллил хIатталливгу.
Жагьилсса администраторнал сиптардая ххарину, гъирарай бувккунни жагьи-жугьулт, райондалул идарарттал зузалт. Арамтурал дакьин дунни хIатталлил лагмасса чапар. «Чапар гъагъари хьуну дуну, чIярусса шиннардил мутталий хIатталлив ризкьи бухлай бия. Хъунмасса тавакъюри шяраваллил жяматрахь, зула-зула ризкьилул хъирив бацIаву, ми хIатталлив, дяшяравун буххан къабитаву», — увкунни МахIаммад ХIусниевлул. Барчаллагь увкунни дан дакIнийсса давурттан кумагран 30 азарда къуруш дуллусса гъумучиричу Мурад Шахшаевлухь.
Вайва гьантрай, къувирду дуцIин дурну, ххюл бивчуну, грейдер гьан дурну, бакьин бунни Гъумучиял къалалучIан нанисса ххуллугу. Укунма ххюлгу бивчуну, грейдер гьан дан дакIний бур шяравун бухлахисса цайми ххуллурдугу. Муния махъ МахIаммад ХIусниевлул, ххуллурдацIухсса ттучаннал заллухъруннащал ихтилат бувну, дюъ дирхьунни лагма-ялттусса кIанттурдай марцIшиву дуруччин.
