Дахьва гьашину арулва класс къуртал бувсса чIиви душ бухьурчагу, Аида Садикьовал цIа диялну машгьур хьуну дуссар, цила оьрмулух бурувгун. Дуккавривугу хъинну итххявхсса, гьунар ххисса душри. Республикалул лагрулийсса ци журалул конкурсирдай гьуртту хьурчагу, хьхьичIунсса кIантту бугьайссар мудан, чIявуну цалчинсса.
Гъумучиял магьирлугърал школалул къавтIаврил ва балай учаврил ансамбльдануву хьхьичIунсса солисткар. Лакрал райондалул цIа гьаз дуллалисса дуклаки оьрчIавасса цар. Лакрал райондалул вихшалар.
Мяйжаннугу, гьунар бусса инсан гьарзадрала гьунар бусса икIайсса ур. Вана вай гьантрай щалла интернет гьузи лархъун дур Аида Садикьовал ва ряххилчинмур классраву дуклакисса ванил дус Аминат Муслимовал дурсса къучагъсса тIулуя буслай. Бярув оькьлакьисса мукьра шинавусса оьрчI ххассал аврихлу Аьрасатнал МЧС-рал Дагъусттанналмур управлениялул Аида ва Аминат ккаккан бувну бур наградалийн – му дулун тIий дур гьаршинал ахирданий шайсса «Созвездие мужества» фестивальданий.
Гъумучиял бярнил ккурккайх велосипедрай бигьлагьисса душаран хIисав хьуну бур бярув личлачисса щинал бюнбутIив. Щинавун бучIлачIисса ккаччи бухьунссар тIий, къулагъас къадурсса, цакуну ящуну бур щинавух галай дуллалисса чIиви оьрчIал канийн.
— ТалихIиннаран, оьрчI зумания архну акъая, акъарив оьвкьун гьанссия. Уккан хIарачат буллай ия цувагу. Щинал ялтту чIалачIисса каниха увгьуну, уккан арду зуманийн. ОьрчIал вив чIярусса щин ларгун дия. Ттун дакIнийн багьуна хIакинну зузисса амудадал инсаннан цалчинсса кумаг бан лахьхьин бувсса. Мукун гьуттурдава щин дуккан дурссия,- буслай бур Аида.
Оькьлакьисса чIивитIугу лявкъуну ур гайннала чIаххувчу ЛухIуев Адам.
Цайна цува учIайхту Адамлул бувсун бур бярнил зуманицIгу авцIуну щинавун чIучIри бичлай унува, ччан ччех бивкIун агьшиву.
— Лахълай лахъан къахьунссар ва хъинбала. Барчаллагь хьуннав укунсса душру тарбия бувсса вайннал ниттихъан ва учительтуран, — тIий бур оьрчIал нину ЛухIуева Аминат.
Лажин хIадур дурссар
Зулайхат Тахакьаевал
