Ларгсса нюжмардий республикалий, чIявусса хъамалгу бувкIун, лахъа-хъунну кIицI ларгунни машгьурсса композитор, дирижер, педагог, СССР-данул халкьуннал артист, профессор Мурад Къажлаевлул оьрмулул 85 шинал юбилей.

И. Саидова
Январьданул 15-нний Оьрус­нал театрдануву хьунни Му­рад Къажлаевлул юбилейран хас бувсса шадлугърал мажлис. Дагъусттаннал профессиональныйсса музыкалул гьану бивзсса, ПаччахIлугърал ва Дунияллул халкьуннал премиярттал лауреат, билаятирттайх машгьур хьусса композитор Мурад Къажлаев барча уван бувкIун бия ДР-лул Президент Рамазан АьбдуллатIипов, Аьрасатнал Федерациялийсса Азирбижаннал республикалул посол Полад Бюлбюль-оглы, Аьра­сатнал ФедерациялучIасса ДР-лул муданмасса вакил Изумруд МухIуттинова, ДР-лул культуралул министр Зарема Буттаева, ДР-лул миллатирттал политикалул министр Татьяна Гамалей, Аьшттарханнал консерваториялул профе­ссор Людмила Круглова, машгьур­сса скрипач Мурад Абуев ва респуб­ликалий машгьурсса культуралул ва искусствалул интеллигенция, дустал ва гъан-маччами.
Юбилейрал мажлис тIитIла­тIи­сса ихтилат бунни ДР-лул Президент Рамазан Аьб­дуллатIиповлул.
— Цинявппагу миллатирттал буссар цалла цIа-кьини бюхттул дуллалисса вирттал, республикалул цIа дунияллийх машгьур дурсса. Мукунминнавасса ца ур жула Мурад МахIаммадович Къажлаевгу. Музыкалул искусство ларайну кIулсса Мурад Къажлаевлул 60-хъул шинал лажиндарай бюх­ттул дурссар Дагъусттан Республикалул цIа. Ванал цIа зумух ласласийни тасттикь хъанай бур жувагу уздансса миллат бушиву, цанчирча миллатру уку-укунсса ххаллил­сса инсантурайнур машгьургу шай­сса, дакIнийгу личIайсса. Мурад МахIаммадович машгьурсса композитор, дирижер, Дагъусттаннал халкьуннал нажагьсса музыкалул произведенияртту цачIун бувма акъассагу, ва ур ПаччахIлугърал жяматрал ва политикалул хъуна­сса ишккаккугу. Му бакъассагу, Мурад МахIаммадович лайкь хьуссар цикссагу Совет Союзрал ва Аьрасатнал Федерациялул орденнан ва медаллан. Республикалийгу ванал творчествалун яла лаваймур кьимат бивщуссар. Расул ХIамзатов ва Мурад Къажлаев кIулли оьрчIния шихунмай оьрмулул ххуллу чанна буллалисса, ляличIисса гьунар бусса инсанталну. Вай инсантурайну Дагъусттаннал цIа цикссагу шиннардил аьсрурдай дакIний личIантIиссар.
Пахру бан лайкьсса иш ба­къарив Мурад КъажлаевлуйхчIин Дагъусттаннал музыка Аьрасатнал ва чил билаятирттал сахIнардай ишлану бушиву. ХIакьинусса кьини Мурад Къажлаев хъанай ур яла хьхьичIунми дунияллул даражалийсса джазрал композитортурава ца.
Республикалул музыкалул тарихраву Мурад Къажлаевлул дур­сса хьхьичIуннайшивурттавасса ца хъанай дур ляличIину итххявх­сса оьрчIансса музыкалул школа тIитIаву, — увкунни Рамазан АьбдуллатIиповлул.
Дагъусттаннал музыка хьхьи­чIун­май бан чIярусса шиннардий бивхьусса захIматрахлу Рес­публикалул Президентнал Мурад МахIаммадовичлун дуллунни «Дагъусттаннал халкьуннал артист» тIисса бусравсса цIа. Мукунма Президентнал Мурад Къажлаевлул кулпатран Валидан дуллунни «За любовь к родной земле» тIисса хIурматрал лишан.
Зарема Буттаевал кIицI лавгунни Мурад МахIаммадович рес­публикалул музыкалул академиялул культуралул унгу-унгусса лишанну хъанахъишиву.
— Мурад МахIаммадовичлул лавхъун бур музыкалул цинявппа жанрардал яла лахъми шачIантту. Мяйжаннугу авадансса бур ванал творчествалул биография. Мурад Къажлаевлул музыкалул произведенияртту щаллу буллай бур концертирттал заллал, театрдал, телеэфирдал сахIнардая. Пахру бан бучIисса зат бур Мурад МахIаммадович Юрий Силантьевлул цIанийсса Академиялул концертирттал оркестрданул хъунама дирижерну ва каялувшиву дуллай ивкIшиврия. Ва оркестрданий каялувшиву дуллай ивкIсса 20-хъул шиннардил мутталий Мурад МахIаммадович лайкь хьуну ур «Академический», «Серебряное плато Италии», «Гран-При Кореи» тIисса хъунисса наградарттан, — увкунни Зарема Буттаевал.
Мурад Къажлаев барча уван Дагъусттаннайн бувкIсса бусравсса хъамаллуравух ия цинявннан нукIува ххира хьусса, машгьурсса Азирбижаннал артист Полад Бюльбюль-оглы. Ванал дурккунни Азирбижаннал Президент Ильхам Аьлиевлул Мурад Къажлаев юбилейращал барча уллали­сса адрес. М. Къажлаевлун дуллунни Азирбижаннал президентнал чулухасса «Орден Дружбы» (Дос­лук) награда.
Мурад МахIаммадовичлул юбилейрайн бувкIсса хъунисса хъамаллурал ихтилатирттаву кIицI лаглай бия ванал творчество, Да­гъусттаннал халкьуннан дакъассагу, Аьрасатнал ва чил билаятирттал агьалинангу цачIусса душиву.
«Хъунмасса хIурмат буссар Мурад Къажлаевлул Аьшттарханнал агьалиначIагу. Жул консерваториялуву хьусса ванал цинярда концертру личIантIиссар Аьшттарханнал ПаччахIлугърал консерваториялул тарихрал яла яргми лажинтирттай»,- увкунни Людмила Кругловал.
Мурад МахIаммадович юбилейращал барча уллалисса телеграммарду гьан дурну дия Аьрасатнал культуралул министр Владимир Мединскийл, АьФ-лул Федерал Мажлисрал Советрал председатель Валентина Матвиенкол, АьФ-лул ПаччахIлугърал Думалул Федерал Мажлисрал Федерациялул советрал председатель Сергей Нарышкиннул, ПаччахIлугърал Думалул председательнал хъиривчу Иван Мельниковлул, Аьра­сатнал Президентнал администрациялул каялувчинал хъиривчу МахIаммадссалам МахIаммадовлул ва мукунма чIявусса цайминнал.
Театрдал ишккаккултрал союзрал правлениялул председатель Айгум Айгумовлул кIицI лавгунни жула композиторнал музыка хъиннува машгьурну бушиву Европанаву, Американаву, Азиянаву ва Африканавугу.
Мажлисрал ахирданий, цалла творчествалун лавайсса кьимат бищаврихлу ва цува лахъа-хъун уван бувкIсса хъамаллурахь, дакIнийхтунусса барчаллагь увкунни Мурад МахIаммадовичлул.
— Январь зурул 12-нний ванияр 65 шинал хьхьичI на цалчин­сса ттулва произведение бивхьу­ссар Бакуйннал сахIналий. Шиннурив зана ритан къахьунссар, музыкалул тIурча гьарица оьрмулуву хьусса иширттал лахIзарду дакIнийн бутлай бур. Ттун хъинну бусрав хьунни ттулла творчество ххирасса агьали хIакьину шикку цачIун батIаврия. ЩилчIав амрулийну макьанну тачIав къачирчу­ссар, так ттула дакIнил амрулийну дакъа. Бусса оьрмулий на ттулла Ватандалийн дакI тIайлану захIмат буллай ивкIссара, — увкунни Мурад МахIаммадовичлул.
Ихтилатирттая махъ ккаккан дунни Мурад Къажлаевлул цIанийсса ляличIину итххявхсса оьрчIансса музыкалул школалул сакин дурсса ххаллилсса концерт. Мукунма концертрай гьурттушинна дунни Дагъусттаннал машгьурсса артистътурал, «Гая» тIисса Азирбижаннал паччахIлугърал ансамбльданул, Дунияллул Халкьуннал конкурсирттал лауреат, Великобританиянавасса Чисато Кусунокил, Аьрасатнал Халкьуннал артистка Анна Литвиненкол ва мукунма чIявусса цайминналгу.
Хъиривмур кьини, январь зурул 16-нний, республикалул ляличIину итххявхсса оьрчIансса Мурад Къажлаевлул школалий хьунни хъамал хьунабакьлакьисса кьини. Цинявппагу юбилейрайн бувкIсса хъамаллурал ххал бунни ляличIинува итххявхсса оьрчIансса музыкалул школа ва шиккува Мурад Къажлаевлул хIарачатрайн бувну тIивтIусса Республикалул музыкалул тарихрал музей.