Гьашину 17-мур шинни дунияллул халкьуннал ниттил мазрал кьинилул байран дуллай. Гьар шинах, чIявусса хъамаллурайнгу оьвкуну, ххуйну хIадургу хьуну, цинявннан дакIний личIансса ку­ццуй дувай ЦIуминалийсса ЦIуссаккуллал школалий ва байран.

ПатIимат Рамазанова
Гьашинугу спортзал оьрчIи-чIюлу бувну бия: лакку мазрайсса плакатру, баннерду лархъун, буттахъал заманнайсса ичIаллил матахI, тIахIни-кIичIу ккаккиялун дишин дуккан дурну, лакку ужагъ хьхьичI бивхьуну. ЦIуссаккуллал школалийн ниттил мазрал кьини хъун дуван бавтIцири хъамаллуравух бия ЦIуссалакрал райондалул КIулшиву дулаврил управлениялул хъунаманал хъиривчу Кудаева Светлана, Аьхъардал школалул директор ХIасанаьлиева Раиса, Чапаевкаллал школалул директор АхIмадов Камил, райондалул магьирлугърал зузалт, шяраву махъ нанисса, сийлийсса инсантал. Фестивальгу дайдирхьуна, гьар шинах кунна, лакрал гимн учаврийну.
Школалул директор Татьяна Айгуновал бувсуна байрандалун «Адабиятрал кьини» цIа дирзшиву, миллатрал маз ябай, чул бищай къалану, гьаманки, миллатрал литература хъанай душиву. Бувсуна цуппа каялувшиву дуллалисса школалий хъунна­сса къулагъас душиву ниттил мазрал ва литературалул дарсирдах, гьарцагу школалий ниттил мазрал дарсирдал хIурмат бикIан аьркиншиву.
Ва кьинисса байран мукьва бутIуя хIасул хьуну дия: магьри, проза, фольклор (аьдатру), наз­мурду. Мукьилчинми классир­ттаву дуклакисса оьрчIал хIадур бувну бия «Жанавартрал кIи рутаву» тIисса магьа, шамилчинмур классирттаву дуклакиминнал – «ХIиллакар» тIисса бусала. Лакрал проза ккаккан бувна оьрчIал инсценировкардайну. Ряххилчинмур классирттаву дук­лакиминнал лакрал драматург Минкаил Аьлиев­лул чивчусса «Аздар ва Зайнаб» тIисса произведениялувасса парчри кка­ккан бувна. Арулчинмур кла­ссрал хIадур бувну бия МахIмуд Хуршиловлул чивчусса «ХIухчу Рамазан» сценка, ххюлчинмур классрал – Хизгил Авшалумовлул чивчу­сса «ПатIима-бавал гьалма­гъай». Аьдатир­ттан хас бувмур бутIуву мяйлчинмур «б» класс­раву дуклакиминнал ккаккан дурна «Карщи рутаву» тIисса аьдат. Назмурдугу чIяруми ниттил мазран хас дурсса дия. Юсуп Хаппалаевлул, МахIаммад-Загьид Аминовлул, Даниял Магьдиевлул, ПатIимат Рамазановал ва цаймигу шаэртурал назмурду дурккуна ­Оьмаев Русланнул (2 «а» класс), Рамазанова Аьйшатлул (3 «б» класс), Сулайманов Анвардул (2 «а» класс), МахIаммадова Зулайхатлул (3 «а» класс) ва лавайми классирттаву дуклакисса Аьли­ева Каринал, Буттаева Лаурал, Алункъачева Сумайсатлул, Амирханова Фаридал, Аьллаев Абакардул. Балайрду увкуна 5-мур классраву дуклакисса Пирбудагъова Маликал, 6-мур классраву дуклакисса Мамма­ккуев Шяпинал.
ЦIуссаккуллал школалий дур ХIасан ХIанапиевичлул каялувшиву дуллалисса «Зун­ттал макьанну» инструментир­ттал ансамбль ва Аьли Даудовичлул каялувшиву дуллали­сса къавтIаврил ансамбль «Щаращи». Лях-карах ми ансамбльлал къавтIалтрал ва музыкантътурал ккаккан бувна цавува­сса гьунарду. Школалийсса сайки гьарцагу мероприятиялийн бучIайсса, чIарав бацIайсса Гавзиева Аминатлул бувна оьрчIахь маслихIатрайсса ихтилат, Рамазанова Уммужигьаннул бувккуна цила чивчусса «Ниттил маз» тIисса шеъри.
ЦIуссаккуллал школалий ва кьини лавайсса даражалий ларгсса байрандалул цIакь бу­л­лай бия дакIурдиву ниттил маз ябан­сса, мазрал кьадру кIулсса наслу хъирив наниминнаву бур­хха, му даврих дагьайкунсса аякьа дуллалисса учительтал ва директортал бурхха тIисса пик­ри. Байрандалий гьуртту хьуна сайки щалвагу школалул дук­лаки оьрчIру ва учительтал, Татьяна Айгуновал къаучирчагу, маз миллатрал ххазина бушиву бувчIлачIисса ва му ххазина ябаву цайвасса буржну чIалачIисса инсантал. Укун­сса пикри оьрчIал дакIурдивун бутавугу – ххуйну зузисса учительтурал биялар.