Апрель зурул 27-нний ЦIуссалакрал администрациялул ирг­лийсса заседаниялий ххалбивгьунни агьамсса масъалартту. Райондалул хъунама МахIаммадхIажи Айдиевлул кIул бунни цIу­сса хъиривчу Султан ХIамзатовлущал. Бувсунни цала цалчинма хъиривчу Аьбдурашид Буттаевлуйн ЦIуминалийсса агьамсса масъалартталсса ва къайгъурдалсса буллан тапшур буллалишивугу.

Ххалбивгьунни, мукунма, Ххувшаврил юбилейрайнсса давурттал хIадуршинна цукунсса бущилий най дуссарив. Райондалий байран кьининин субботникру дуллайнма бур ттигу. ЦIуссалаккуя Хасавюртливсса ххуллу, ЦIуссалакрал перекрестокрая тIайла хьуну, КПП «Герзель-ламучIан» бияннинсса федерал трасса шяраваллайх бавчIуну тапшур бувну бур лазилакьи буван. МахIаммадхIажи Айдиевлул чIуручIаву дунни Ххувшаврил байран лайкьсса даражалий тIайла дуккан аьркиншиву ва цува хIадуршиннарал ялув авцIуну ушиву. Махъзуманив сайки гьарцагу заседаниялий гьаз бай Ххувшаврил байрандалийнсса хIадуршиннарал масъалартту. Апрель зурул 23-нний хьумур совещаниялийгу райондалул хъунаманал хъиривчу Ися Чергизбиевлул бувсунни ветерантуран юбилейрал медаллу дуллуну къуртал дуршиву ва фронтовиктурал къатрайн цIарду чирчусса улттив лачIун дуллай бушиву. ЦСОН-далий каялувшиву дуллалисса Малика Жамхатовалгу бувсунни социал зузалт гьарцагу ветеранначIан шаппа-шаппай занай бушиву ва миннан аьркинсса социал кумагру бувайшиву. Райондалул хъунаманал хъиривчу Хизри Рамазановлул бувсунни вир­ттаврансса циняр гьайкаллугу дакьин дуллай, миннул лагма-ялттусса кIанттурдугу лазилакьи буллай бушиву. Райондалул кказитрал редактор Уммугьани ЯхIияевал бувсунни агьалинал дянив баян бувшиву патриот темалун хасъсса конкурс ва мунийн чIярусса материаллу дукIлай душиву. Культуралул управлениялий каялувшиву дуллалисса ХIабибат Буттаевал бувсунни райондалий хьусса художествалул самодеятельностьрал конкурсрая ва байрандалул лагрулий коллективрал дурсса давурттая. Мунияр хьхьичI хьумур совещаниялий райондалул хъунама ХIажи Айдиевлул бувсунни Ххувшаврил байран дурну махъ гьарца нюжмардий дайсса совещание зуруй кIийлла цIуминалий дуллантIишиву. Мура совещаниялий администрациялийсса цIусса зузалт кIул бунни Шяраваллил хозяйствалул управлениялул хъунаману ивтсса Камил МахIаммадовлущал, аьрщарал ялувацIаву дуллансса инспектор Муса ХIусайновлущал, Республикалул БакIчинал жяматийсса приемнайлий каялувшиву дуллантIисса АхIмад Нахаевлущал. Бувсунни, аьдатрайн бувну, ЗахIматрал ва интнил байран ЦIуминалий дантIишиву, Ххувшаврилмур байран тIурча – ЦIуссалакрал райондалул майданнив. Миккува райондалул хъунаманал тапшур бунни, ЦIуссалакрал райондалий къатри дунура, ЦIуминалийн бизантIиминнал ХIукуматрал комиссиялувусса сияхIравун къабагьсса кулпатир­ттащал хьунабавкьуну, минналми мурадругу бартбигьин, заллухъруннал цалла къатри дуван учас­токру личIи дуван.