Гьашину Лакрал райондалий школа къуртал буллай ур 67 дуклаки оьрчI.

Гьарцагу шинал Лакрал райондалул администрациялул зузалт лагай махъва-махъсса занглил байрандалийн, школа къуртал буллалими барча бан, миннахь ххуллухъин учин.

Зулайхат Тахакьаева
Гьарца школалул дур шиннардий цIакь хьусса ва байрандалун хасъсса хъин-хъинсса аьдат­ру. Гъумучиял школалий, гьарца шинал кунма, ва кьинигу школа къуртал буллалими чут-чутну бувккуна хIаятравун. Яла къавтIун бивзуна «школьный вальсрай». Муния махъ бавцIуна линейкалий. Гихунмай шеърирдайну, балайрдайну барчаллагь тIий бия учительтурахь ва школалухь. ХIисав къархьуну къаличIлай дия миннал симаннайсса ххаришивугу, хъювусулшивугу.
Школалул 77-мур выпускрал оьрчIру барча буллай, директор Жяъпар Кканккаевлул бувсуна гьашину дуклаки оьрчIал дуккавриву ва спортраву дурсса хьхьичIуннайшивурттая, школа ххуйсса ккаккиярттащал къуртал буллалиминнан дуллуна грамотартту. КIицI лавгуна школалул тарихраву ттинин къавхьусса иш. Цалчинмур классравун ххаллилсса кIулшивурттащал увкIсса Гунашев Жяъпар дачIи шинава 2-мур классравун гьан увшиву.
Бувсуна, щалва билаятрайра кризис дусса захIматсса чIумал, райондалул каялувчитурал хIарачатрацIух гьашину байбихьулул школа бивкIсса кIанттай цIусса, кIизивулийсса, гьарца шартIирдал дузалсса къатри дурну къуртал дуршиву. Гиву бикIан тIий бур байбихьулул школагу, лагма щархъавасса оьрчIансса, школалийн хIадур буллалисса 60 оьрчIансса группагу.
Цалва итталу хъуни хьу­сса оьрчIахь ххуллухъин тIисса ихтилатру бувуна миннаву цалла дакI дирхьуну зий бивкIсса цалчинсса учительница Зумруд АхIмадхановал, завуч Асият Айгуновал, классрай каялувшиву дуллалисса Барижат ХIасанаьлиевал.
Яла нанисса дуккаврил шинаву Гъумучиял школалул хьун дурсса хьхьичIуннайшивурттая буслай, КIулшиву дулаврил управлениялул каялувчи Явсупи ХIамзаевлул кIицI лавгуна «Первоцвет» тIисса республикалул конкурсрай гьуртту хьу­сса Лак­рал райондалиясса шамагу дук­лаки оьрчIал бувгьушиву 1-мур кIану. Миннавасса Гъумучиял школалул 4-мур классрал дуклаки оьрчI Аьлишаев Маликлун буллунни диплом.
Оьрмулул кIи-шанбачIулул ххуллийн буклакисса, школа къуртал буллалими барча бан, ва оьлув­къусса заманалий щаращисса дунияллий цалвамур ххуллу лявкъуну, му ххуллу битан бигьану къабикIантIишивугу кIицI лаглай, гьарца бивзсса шаттираву миннан тIайлабацIу чIа тIутIисса ихтилатру бувуна Лакрал райондалул бакIчинал хъиривчу Юсуп Рамазановлул, депутатътурал соб­раниялул хъунама Шяпи Щурпаевлул, школа къуртал буллалиминнал нитти-буттахъул Руслан Сулаймановлул ва Шарипат Абакаровал.
Ахирданий рирщуна махъра-махъсса занг. Ссавнийн итабавкьуна шардацIун бавхIусса дакьаврил къукъухьхьиру, гайннуй цалва мурадругу чивчуну. Гихунмай школа къуртал буллалими бия куннал гьухърай кув тIайлабацIулул махъру чичлай.

Гъумучиял лицейраву – махъра-махъсса занг

Ва кьини школа къуртал буллалиминнан архIалла ххарисса ва пашмансса асардал дурцIусса духьурча, Гъумучиял лицей къуртал буллалиминнан ва учительтурал коллективран пашманми асарду ялтту буклай бия. Махъра-махъсса занглил байран лицейран хьунни бунияла махъра-махъссану. Гьашину, 19-мур выпускгу итабавкьуну, июль зурул 1-нния тинмай Гъумучиял лицей лакьлакьиссар тIисса тIааьн бакъасса хаварданул ххарими асардайн ххют рутлай дия.
Гъумучиял лицейравугу дур цилла аьдатру. Лицей къуртал буллалими чут-чутну бувккун бацIай лицейрал хIаятравусса дяъвилия зана къавхьуминнал аьпалун дацIан дурсса гьайкалданучIа. Яла лакку мазрай учай лицейрал гимн. Школалухь барчаллагь тIутIисса цала хъуними уссурссуннал байран лахъа-хъун дан линейкалий бацIай 7-мур классрал дуклаки оьрчIругу. Лицейрал директор МахIаммад Хъунбуттаевлул школа къуртал буллалиминнахь ххуллухъин тIисса ихтилатраву бувсуна лицей къуртал бувсса оьрчIал ххуйсса дуккаврихлу ва тарбиялухлу учительтурахь барчаллагь тIисса чагъарду гьарца шинал бучIайшиву ми дуклакисса лавайсса дуккаврил идарарттал хъуниминнал цIания. Гьашину райондалул ва республикалул олимпиадарттайгу, конкурсирдайгу хьхьичIунсса кIанттурду бувгьусса выпускниктуран дуллуна грамотарду. Ххуллухъиндарал махъру миннахь ялагу увкуна Юсуп Рамазановлул, Явсупи ХIамзаевлул, классрай каялувшиву дуллали­сса Написат Къапиевал.
Выпускниктал балайрдайну барчаллагь тIий бия учительтурахьгу, директортурахьгу, интернатрал зузалтрахьгу.
Гъумучиял школалийгу, лицейравугу махъра-махъсса занг­лил байран чIюлу дуруна Гъумучиял оьрчIал магьирлугърал школалул къавтIалтрал.