Мубараксса Зумаритавал байрандалул хьхьичI кьини райондалул хъуними бивунни шяраваллавусса хIатталлайн. Райондалул БакIчи МахIаммад-ХIажи Айдиев, мунал хъиривми Султан ХIамзатов ва Гъаирбаг Мусаев, Халкьуннал Мажлисрал депутат Зайнуллагь Мирзоев,
райондалул депутатътурал собраниялул председатель Мавлидин Исламаьлиев, райондалул ОВД-лул хъунама Садруттин Рашидов бивунни гьарцагу шяравусса хIатталлив, къуллугърал буржру биттур буллай ливтIусса органнал зузалтрал гьаттардийн. Бувккунни алхIам, кьулгьу.
Зумаритавал байрандалул кьини тIурчарив МахIаммад-ХIажи Айдиев, Зайнуллагь Мирзоев ва Мавлидин Исламаьлиев бивунни гьарца шяравусса имамтурачIан. Миннащалсса ихтилатраву райондалул хъуниминнал барчаллагь увкунни динийсса лидертурахь, агьали цачIунмай баву ва мяърипат ххуй даву мурадрай дуллалисса давурттахлу. «Диндалул байраннал, агьалинал дакIругу, мурадругу цану бушиву ккаккан буваву дакъассагу, цIакь дуллалиссар агьалинал куннал куннащалсса дахIаву, ххуй дуллалиссар арарду», — увкунни МахIаммад-ХIажи Айдиевлул ЦIуссачIурттащиял шяраву махъ нанисса динчи ва меценат Кьурбандибир ОьмарасхIабовлул ужагърай. Зумаритавал байрандалул гьантрай райондалул хъуними гьар шинах бияй шяраваллавун, агьали байрандалущал барча буван.
