Гьарца шинал кунна, гьашинугу дакIний личIансса ЦIушинал елкалул байран хIадур дурну дия оьрчIан райондалул администрациялул, ОьрчIащалсса ва жагьилтуращалсса даврил отделданул, кIулшиву дулаврил ва магьирлугърал идарарттащал цачIуну.
Муний гьуртту хьунни райондалул бакIчитал, идарарттал каялувчитал ва зузалт, дуклаки оьрчIру ва мюрщулт. Райондалул бакIчи Юсуп МахIаммадовлул барча бувна бавтIми ялун нанисса ЦIусса шинащал. Яла нанисса шинал райондалул оьрмулуву гьарцагу аралуву бивхьусса дакI тIайласса захIматрахлу администрациялул чулухасса ХIурматрал грамотартту ва арцуйнусса бахшишру дуллуна идарарттал зузалтран, дуккавриву ва спортраву хьхьичIуннайшивуртту хьун дурсса дуклаки оьрчIан.
Муния махъ магьирлугърал зузалтрал ккаккан дурна яргсса ЦIушинал байрандалул программа. Мюрщултрайх бавчIуна Дякъил-Ттаттал кьуцурттува ва Марххала-Душнил кислувасса ссайгъатру.
