Ларгсса нюжмардий «Илчи» кказитрал хъунмур редактор ХIусайнаева Качар Абачараевна 70 шинал юбилейращал барча буван редакциялийн биялсса хъамал бувкIуна, лавхъуна хъин-хъинсса махъру.
Бадрижамал Аьлиева
Му кьини бувкIсса хъамаллуравух бия ДР-лул культуралул министр Зарема Буттаевагу. Барча буллалисса адресраву увкуну бия:
«ХIурмат бусса Качар Абачараевнай!
Кьамул дува юбилейращалсса дакIнийхтунусса барча баву Дагъусттан Республикалул Культуралул министерствалул чулуха, республикалул культуралул ва искусствалул ишккаккултрал чулуха.
Вил творчествалул ва пишакаршиврул ххуллу хъанахъиссар дагъусттаннал халкьуннахасса дакIнийхтунусса къуллугърал эбратну. Ина, Лакрал музыкалул ва драмалул театрданул литературалул бутIуй каялувшиву дуллай, театрданий каялувшиву дуллай, чIярусса шинну дуллуссар культуралул аралун. Махъсса шиннардийрив ина хьхьичIунну зий бура СМИ-лул аралуву, «Илчи» кказитрал хъунмур редакторну.
Даврихсса ччаврийну, пишакаршиврул буржирайн хаин къашаврийну, кьянкьасса граждан позициялийну вил хIурмат лавайссар даврил уртакьтурачIа ва халкьунначIа. Вил пишакаршиврул ххуллул ца бутIа ялагу кIицI къалавгун къабучIир – ниттил маз ххирану махъа нанисса ник тарбия даву, лакрал миллатрал маз ва цаймигу багьа бищун къашайсса хъус жагьилтураву машгьур дуллалаву. Ина каялувшиву дуллалисса кказитрал лажинтирттай хъунмасса кIану бугьлай бур культуралул, аьдатирттал, багьу-бизулул, кIулшиву дулаврил, кулпатирттаву ниттил маз ябаврил масъаларттал. Му ххишала дакъа хъуннасса агьамшиву дусса кIанур жунма.
Республикалул ва билаятрал цIаний ина бувсса захIматран кьимат бивщуну бур хIукуматрал ларайсса наградарттайну ва цIардайну: «АьФ-лул культуралул лайкь хьусса зузала», «ДР-лул культуралул лайкь хьусса зузала», министерстварттал ва муниципал сакиншиннардал чулухасса хIурматрал грамотартту.
Вилла юбилейрал кьини ихтияр дула хъунмасса барчаллагь учин миллатрал мазрал культура ядавриву бивхьусса хъунмасса бутIухлу, республикалул СМИ-рдал аралуву Дагъусттаннаха бувсса дакI марцIсса лайкьсса къуллугърахлу.
ДакIнийхтуну чIа тIий бура вин цIакьсса цIуллушиву, творчествалуву цIу-цIусса хьхьичIуннайшивуртту, буллугъшиву вин ва вил гъан-маччаминнан».
