ЦIуссалакрал райондалул школарттай най дур «Мы дружбой народов сильны» цIанилусса фестиваллу. Фестивальданул лагрулий Чапаевкаллал №1 школалий ларгунни классный час «Край мой – Дагестан».
Ванил мурад бия дуклаки оьрчIру буттал улча ххирану тарбия баву, миннавун буттал улклул авадансса тарих, жула аслийсса культура ва ирсирай нанисса аьдатру лахьхьинсса ва дуруччинсса гъира бутаву, Дагъусттаннал халкьуннал ххазинардая, буттал буттахъачIа кьиматрай диркIмуния бусаву. Классный час хьунни дянивми классирттал оьрчIащал. Му дунни школалул организатор Диана Шайхаьлиевал.
Мероприятиялий гьуртту хьунни школалул директор Мурта Абакаров, учительтал. Дуклаки оьрчIругу, учительталгу цинявппа бия Дагъусттаннал халкьуннал янналуву, ккаккиялун дирхьуну дия жула аслийсса культуралул барашинна дуллалисса кьай-кьуй. Хьунни мукунна Дагъусттаннан хас бувсса луттирдал выставка, ккаккан дунни Дагъусттаннал халкьуннаясса видеофильмру. Ихтилатру бунни учительтурал ва дуклаки оьрчIал.
Ихтилатчитурал кIицI лавгунни Ватан гьарицагу инсаннан яла аьркинмур ва яла ххирамур душиву, Ватан дуруччаву гьарцагу инсаннал бурж бушиву. Дуклаки оьрчIал бувккунни Дагъусттаннал халкьуннал шаэр Расул ХIамзатовлул шеърирду, увкунни Дагъусттаннахасса балайрду, ккаккан дунни Дагъусттаннал халкьуннал къавтIавуртту.
Классный часрай оьрчIру кIул хьунни буттал улклул тарихращал. Учительнал бувсунни жула республикалий 10 шагьру, 41 район, 1639 шяравалу душиву, Дагъусттан чIяву миллатру бусса, гьарицаннал цала-цала культурагу, аьдатругу дусса, ляличIисса республика душиву, Дагъусттаннай цанна хасъсса яхI-намусрал, мяърипатрал кьанунну душиву.
Дуклаки оьрчIал Дагъусттаннал халкьуннал аьдатру ккаккан дуллалисса инсценировкартту дунни. ТIивтIуну бия Дагъусттаннал халкьуннал дукрардал чIюлу бувсса авадансса ссупра.
