Байран. Му байран цурдагу дархIуну дур кIулшиву ласаврицIун ва дуккаврицIун. Ялагу му байрандалийн учай «КIулшиврул кьини» куну. Буниялагу, сентябрь зурул 1-мур кьини хъанай дур, чIивиманахьхьун , хъунаманахьхьун хьуннав, тIабиаьтрал, инсантурал оьрмулул караматшивуртту тIитIай кIулли дулайсса кьини. Ва кьини вин хьунабакьлай буссар ххуй-ххуйсса лаххиярттавусса цалчин школалийн нанисса оьрчIру, школа къуртал бувну махъ, гихуннаймур кIулшиву ласун нанисса жагьилтал.
Ккуллал райондалий гьашину школалийн лавгун ур 900 оьрчI. Цалчинмур классравун лавгунни 86 оьрчI. Дур ва сияхIрай ца пашмансса аьшгу. Вай дукIуссаннуяр чансса бур. Къяннал шяравусса школалийннив цалчинмур классравун цаягу оьрчI къалавгунни, ми шяраву бакъа тIий.
Махъсса шинал мутталий райондалийсса дуклаки оьрчIал хъинну хьхьичIунну шаттирду лавсунни. Масалдаран, дукIусса дуккаврил шинал 14 оьрчIал къалавсун бивкIхьурча аттестатру, ЕГЭ дуллалийни лагьсса кьиматру ласаврийн бувну, гьашину мукунсса ур 4 оьрчI. Ца ур 9 класс къуртал буллай ивкIссагу. Вайгу чIал къавхьуну МахIачкъалалийн гьан тIий бур цIунилгу ЕГЭ дуллан. Ялагу дукIу райондалийсса школартту 6 оьрчIал медаллайну къуртал бувну бивкIхьурча, гьашину 14 оьрчIал къуртал бувунни. ДукIусса шинал Дагъусттаннал КIулшиву дулаврил ва элмулул министерствалул жямрайн бувну, Ккуллал райондалул УО бивкIхьурча 52-мур кIанттай, гьашину бур 32-мур кIанттай. Зунттал районнал дяниврив бур 6-мур кIанай.
