Итни кьини Гъумук Хъун дяъвилия зана къавхьуминнал гьайкалданучIа хьунни дяъви байбивхьусса кьинилун хас дурсса аьпалул митинг. Муний гьуртту хьунни райондалул бакI дургьуми, идарарттал каялувчитал ва зузалт, дуклаки оьрчIру.
Лакрал райондалул администрациялул бакIчи Абакар Къюннуевлул ва аьрали комиссар ХIасан Масуевлул Хъунмасса Буттал КIанттул цIанийсса дяъвилия зана къавхьуминнал гьайкалданучIа бивхьуна тIутIал шалкка.
Митинг дайдирхьуна ца минутIрайсса пахъ багьаврийну.
Цалва ихтилатраву Абакар Къюннуевлул увкуна: «74 шинал хьхьичI ва кьини жулва билаятрал бакIрачIан дуркIссар оьсса кьини — байбивхьуссар Хъунмасса Буттал КIанттул цIанийсса дяъви, мунищала архIал дайдирхьуссар хIасратру, ккаши, зулмурду, ятиншиву. Инсаниятрал тарихраву яла оьттул ттур дуркмур дяъви лахъи лавгссар 1418 гьантлий. Так Совет Союзрай ва дяъвилул лавсъссар 27 миллиондалийн бивсса инсантурал оьрмурду. Дяъвилул щавщи бивссар билаятрал сайки гьарцагу кулпатрайн. Та дяъвилул лажингу, дарсругу жунна тачIав хъамаритан къааьркинссар».
Ихтилатру бувна ХIасан Масуевлул ва Ккурккуллал школалул директор Даниял Магьдиевлул.
Гъумучиял ОьрчIал творчествалул къатлул дуклаки оьрчIал бувккуна дяъвилул шиннардин хас бувсса шеърирду.
