Даврил аьрххилий Дагъусттаннайн бувкIсса Аьрасатнал Федерациялул Советрал сенатор Елена Шумилова вай гьантрай хьунабавкьунни хасъсса аьралий операциялий чувшиврий жанну дуллусса дагъусттанлувтурал ниттихъащал, щахъаннищал, ссурвавращал. Хьунабакьаву хьунни Дусшиврул къатлуву.

[dropcap]С[/dropcap]енаторнал кIицI лавгунни цинма хавар бушиву «Сила матерей» ккурандалия ва ккуран федерал даражалийн дуккан дансса пикрилий бушиву цуппа.
«ХIакьинусса кьининийн Аьрасатнал цавагу региондалий дакъар укунсса ккуран. Ттун пикри хьунни, зул ккурандалул бюхъу ишла бувну, укуннасса ккуранну цайми регионнайгу сакин дансса сипталущал буккан. ДахIалай чинсса сиптарду дур зул ккурандалул жула вирттаврал аьпа абад баврил ххуллий дузрайн дуккан дурсса ва дан дакIнийсса. Масалдаран, уттинин бувгьусса «Аьпалул багъ», Вирттаврал мизитрал ялув зий бушиву, Аьпалул лу чичинсса материал датIлай бушиву. На махъ бакъа ва ккурандалия Федерациялул Советрай бусанна», – увкунни Елена Шумиловал. Ванил маслихIат бунни Ххувшаврил кьини «Сила матерей» ккурандалул сакин бан цала Бессмертный полк.
Шумилова Елена Борисовна бур Коми Республикалул чулуха­сса Аьрасатнал Федерациялул сенатор.

Ванил къуртал бувну бур Комиллал паччахIлугърал пединститут. Зий бивкIун бур Комиллал телеканаллай: корреспондентну, телеведущаяну, личIи-личIисса программардал редакторну, «Медиа группа «ДОМ» журналданул редакторну, «Север-Медиа» информагентствалул директорнал хъиривчуну.
2020 шинал бувчIуну бур Аьра­сатнал паччахIлугърал Думалул депутатну.