[dropcap]М[/dropcap]арт зурул 15-нний Совет Союзрал кIийла Виричу АхIмад-Хан Султаннул цIанийсса МахIачкъалаллал аэропортрайн цалчинсса рейс дунни Бакуйннал шагьрулия «Buta airways» авиакомпаниялул. Аьдатрайн бувну, аэропортрай цалчинсса рейс хьунадаркьунни шадлугърал даражалий.
Ва рейсрай бувкIсса цалчинсса пассажиртал хьунабакьин бувкIунни «Аэропорт Махачкала» АО-лул хъунама директор Саэд Рамазанов ва ДР-лул транспортрал министр Жамбулат Салавов. Цалчинсса шама пассажирнан дуллунни аэропортрал чулухасса сувенирдащалсса бахшишру. Пассажиртурал кIицI лавгунни МахIачкъалалия Бакуйнсса рейсру тIитIиннин ссавур дакъа ялугьлай бивкIшиву.
– Пассажиртурал дянив ца яла тIалавмунин ккаллисса рейс тIитIаврия аэропортрал каялувчи х1исаврай акъассагу, укунасса пассажир хIисаврайгу на хъинну ххарину ура. Азирбижаннащалсса жула дусшиврийсса дахIаву хъиннура цIакь даву мурадрай, жу хIарачат барду вай рейсру цIуницIакул тIитIин. ДакIнийхтуну барчаллагьрай буру Бакуйнсса рейс тIитIин кабакьу бувсса Аьрасатнал ва Дагъусттаннал каялувчитурайн, сенатор Сулайман Керимовлуйн, Дагъусттаннал БакIчи Сергей Меликовлуйн, Дагъусттаннал ХIукуматрал председатель Аьбдулмуслим Аьбдулмуслимовлуйн. Мукунма барчаллагьрай буру ва рейс тIитIаврил масъалартту цала бакIрайн лавсъсса Азирбижаннал Республикалул президент Ильхам Аьлиевлуйн, – увкунни Саэд Рамазановлул.
МахIачкъалаллал аэропортрая Азирбижаннавунсса рейсру дуллантIиссар нюжмардий шамийлла: итни, арвахI ва нюжмаркьинирдай «Embraer 190» самолетирттай.
