Хъаннил байрандалун хасну ГьунчIукьатIрал шяраваллил Культуралул къатлуву хьунни шадлугърайсса батIаву.
Байрандалул концерт дайдишин хьхьичI хъами цалва ва администрациялул чулуха барча буллалисса махъ лавхъуна шяраваллил бакIчи МухIад Штанчаевлул.
Концертрал программа тIиртIуна Залина Гудовал. Гихунмай сахIналийн бувккуна ХIажи Кьубиев, ХIасан Сулайманов, Тамара Аьлилова, Карин Мудунов, Султан ХIусманов. Хъинсса балайрдацIун мукунмасса махъгу лавхъуна ХIажи Кьубиевлул. Цалва ихтилатраву ванал кIицI лавгуна укун цIу лаган бувсса клуб нажагьсса шяраву бакъа бакъашиву, амма шивун заназими чан хьуну бушиву, хьхьичIва культуралул къатта бухсса, ремонт дакъасса бунугу, шивун букIлакIисса инсантал чIявусса бивкIшиву, умуд бивхьунни, ччясса чIумуву дуниялгу паракьат хьуну, инсантал паракьатну яхъананссар, шяраваллил клубгу хьхьичIва кунма инсантурал бувцIуну бикIаванссар тIисса.
[dropcap]М[/dropcap]яйжаннугу, ГьунчIукьатIрал шяраваллил Культуралул къатлуву хьхьичIва ххалаххи багьансса кIану къабикIайссия, чIявуну шайссия тяхъасса мажлисру, лагма щархъаясса къачансса инсанталгу бучIайссия шиккусса концертирттайн. Махъ ппурттуву шяраву лув-ялув бивкIурду хьуну, цукссагу хIалъя клубрал чIирттанмагу музыкалул чIу къабавну. Ва ххуллухмур концертрайгу, вара сававрайн бувну, зал бувцIуну бакъая. ГьунчIукьатIрал Культуралул къатлул директорну ур Закарижа Дандамаев, ванал балай къабавссарив райондалий нажагьсса ухьунссар. Оьрмулул дязаннив Закарижанал хъунама уссу ХIамид аьпалул хьуну хъунма хIал къалавгунни. Укун, цаллагу сахIналийн уккансса дакI дакъа, Закарижанал хIарачат бувну бия. Гъумуча ва чIаххуврайсса Ккуллал райондалиясса цалва дустал бавтIун, шяраваллил инсантурал дакIру ва бигьа дакъасса чIумал чанссарагу аьчух дуккан дувансса, хъаннил хIурматрансса даву дуван. Лакрал ва Ккуллал районнаясса балайчитурал ккаккан дурсса сайки кIира ссятрал мутталийсса концерт, дайдирхьусса кунна, къурталгу дуруна Залина Гудовал, жагьилсса оьрмулий аьпалул хьусса цила уссин хас бувсса балайлийну.
