Расул ХIамзатовлул цIанийсса Национал библиотекалуву «Дагъусттаннал цIанихсса арсру» тIисса проектрал лагрулий хьунни Аьрасатнал Виричу НурмахIаммад ХIажимахIаммадовлун хас бувсса мажлис.
Шикку гьуртту хьунни ДР-лул БакIчинал кумагчи Шамил Аьлиев, Дагъусттаннал экономикалул министр ХIажи Султанов, Да­гъусттаннал миллатрал политикалул ва диндалул иширттал министр Энрик Муслимов, Лакрал райондалул бакIчи Юсуп МахIаммадов, Ккуллал райондалул бакIчи Шамил Рамазанов ва м.ц.

Андриана Аьбдуллаева
Виричу дакIнийн утан був­кIун бия миллатрал хьхьичIунсса арсру ва душру, НурмахIаммадлул дустал, гъан-маччами, архIал дуклай ва къуллугъ буллай бивкIми. Мероприятие тIитIлай, ихтилат бувна Национал библиотекалул хъунаманал хъиривчу Сарат Жабраиловал. Ванил баян бунни жанну дуллуминнал аьпалун минутрайсса пахъ багьаву. Гихуннай вечер дачин дурну бия шаэр, публицист Миясат Муслимова. Ванил бувсунни НурмахIаммад ХIажимахIаммадов аьпалул хьуну махъ Аьрасатнал Чичултрал союзравун кьамул увшиву. Ва хавар баян бувну бур Дагъусттаннал халкьуннан Аьрасатнал Чичултрал союзрал председатель Николай Ивановлул МахIачкъалалив «ХIамзатовлул кьинирду» тIисса проектрал лагрулий хьусса митинграй.
– Аьрасатнал Чичултрал союзрал пленумрай жу цалчин кьамул барду уставрайн къабувсса, дакIнива, къюкIлива нанисса ва хIукму. Ванан луттирду итабакьинсса, цинявннан кIулсса шаэр хьунсса мажал нясив къавхьунни. Амма ва Виричу хьунни. Утти ва Аьрасатнал Чичултрал союзрал членни, — увкуна ванал.
НурмахIаммад дакIнийн утла­тисса, ванал къучагъшиврия бусласисса гьарцагу ихтилат бия виримукьал буцIин буллалисса, дакI хъювсул дуккан дуллалисса.

Сапижат Мазаева, нину:
– Февраль зурул 24-чинсса кьини цайминнан укуннасса кьини духьунссия, ттуннив ххарисса дия. Ца-кIива гьантлул хьхьичI арснан бувсса душния дия ттул хъуннасса ххаришиву. Амма ххаришиврущал архIал дакIниву ца синхралшивугу дия. Муниннин кIия арс хъуна уллай бивкIсса ттун ляличIиссара бахшишну чIалай дия арснан бувсса душ: утти ккаккан данна ттулла ттюнгъашиву тIий буссияв ттухьва нава.
Фазу Аьлиевал увкуну бур: «Гьарца бивтсса ккулла цумурцагу ниттил къюкIливух буккайссар», – куну. Га оь кьини ттул къюк1лийн щуна яла хъунмамур ккулла.
Ттул арс дин-чак дусса, Аллагьнайн вихсса оьрчIъя. Аллагь жуява рязину личIансса куццуй оьрму бутлан аьркинссар тIун икIайва. ХIарачат буллай бура мунал тIийкун навагу яхьун.
НурмахIаммад ттунсса кумагчину, чул бищай кIануну лявхъусса оьрчI ия, арс ттул каругу, ччаннугу, хъаругуя. Оьрмулул 5 шин хьуннин ттул буттал къатлуву, ттул нитти-буттащал, уссищал хъуна хьуссар. Ттул ­уссийя ларсуна мунал зунттал чувнал кьянкьашиву, хъунанахасса хIурмат, чIивинахасса аякьа. Виртталну къаляхъайссар, вирттал шайссар учай. Ттул арс цала цува увсса чувъя.
Барчаллагь «Ниттихъал кьуват» ккурандалун. Зущал чансса духьурчагу рахIат дуклай дур ттул дакI. Укун кIул хьун, укун хIала-гьуртту хьун нясивну бухьунссия жунма.

Юсуп МахIаммадов:
– Шин ларгунни Аьрасатнал Президентнал Украиннал аьрщарай хасъсса аьралий операция баян бувну. Цалчин та операциялуву гьуртту хьун Украиннавун бувкIсса аьралитуравух ия жула НурмахIаммадгу. НурмахIаммадлул учайсса бив­­кIун бур цала дустурахь-аьрали­турахь: «На тачIав къа­ацIантIиссара нацистътурал чапалсса кару ттула чурххайн лаян», – куну. Агу-къаавцIунни. Ванал цинявннан ккаккан дурунни чувшиврул эбрат.
НурмахIаммад дуклай икIай­ссия Гъумучиял лицейраву. Дустурал, учительтурал бусласимунийн бувну, та чIумала кьянкьа-кьурчIисса, аькьлу-кIулши дусса оьрчI ивкIун ур. НурмахIаммадлул цIа дирзун дуссар му занай ивкIсса Гъумучиял оьрчIал спортшколалун. Февраль зурул 23-нний циняв школардай хьуссар ванан хас дурсса Къучагъшиврул дарсру. Мукунна ванал аьпалун Гъумук дурссар щалагу Аьрасатнал шахматирттал турнир. Ва гьарица шинах дуллансса пикригу буссар.
Жува укунсса мероприятияртту дуллай, жула вирттал дакIнийн бичлай буссаксса, вай жущалва буссар.

Шамил Рамазанов:
– Аьрасатнал аьралуннал хIаписар цамур куццуйсса икIангу къабюхъайссия. Цала чувшиврийну ванал гьавас бувтунни цинявппагу аьралитуравун, бюхттул бунни Аьрасатнал аьрал, бюхттул бунни Да­гъусттан.
Ци награда лайкь дурсса бухьурчагу, хасъсса аьралий операциялуву жанну дуллусса жагьилтал цинявппагу вирттавран ккаллиссар. Щак бакъар, ххувшаву журар ласунтIисса.

Гульшан Хасаева, М. Илиясовал цIанийсса «Дараччи» клубрал каялувчи:
– Вирттаврал авадансса, цIа дурксса Надир-шагьнаща, Тамерланнуща канийн ласун къавхьусса Лакку аьрщарай къабюхъайссия цамур куццуйсса арс ляхъан. Укунсса арсру бу­ссаксса жула аьрщарай щилчIав щилтагъсса ша къабизантIиссар. Жува, душмангу ххит увну, ххувшаву ласунтIиссар.

НурмахIаммад дакIнийн утлатисса ихтилатру бувна ялагу Дагъусттаннал Хъаннил комитетрал председатель Интизар Мамутаевал, Информациялул ва печатьрал агентствалул хъунаманал хъиривчу Наида МахIаммадовал, Халкьуннал Мажлисрал депутат Марат Ильясовлул, ДР-лул лайкь хьусса строитель, альпинист Зиябуттин ХIажимирзаевлул, Гъумучиял искусствалул школалул директор МахIаммад Хъунбуттаевлул, МахIачкъалаллал 42-мур школалул директор Ххадижат ХIусмановнал, «Ниттихъал кьуват» ккурандалул каялувчи Сапижат МахIаммадрасуловал, НурмахIаммадлул дус ва одноклассник, СВО-лул гьурттучи Ансар Султанмурадовлул, ниттиуссу Маликлул, уссу Аьбдуллул.
Хасъсса аьралий операциялуву арсру ливтIусса ниттихъан хас бувну цала чивчусса шеъри бувккуна НурмахIаммадлул дус Зиябуттин Аьбдуллаевлул. Виричунан хас бувсса шеърирду бувккуна мукунма Аьрасатнал Чичултрал союзрал член Булбул Оьмариевал, МахIачкъалаллал 16-мур школалул учительница ПатIимат Аьлиевал, дуклаки оьрчIал, ниттил Сапижатлул бувккуна арснал махъва-махъ чивчуну бивкIсса шеъри. НурмахIаммадлухасса балайрду увкуна Луиза Шахдиловал ва Залихха Катибовал.
Мажлис къуртал хьуну махъ рирщуна дакIний личIансса суратругу.