Январьданул 11-нний Дагъусттаннал БакIчи Сергей Меликовлул дунни МахIачкъалаллал лябуккулул хIакъиравусса батIаву.
Муний хъуншагьрулул бакIчинал бувсунни 2023-ку шинал шагьрулул лябуккулул давуртту дачин даврил предложениярттая.
БатIаврий гьуртту хьунни республикалул исполнитель властьрал органнал каялувчитал ва шагьрулул къуллугъирттал бакIчитал.
Дагъусттаннал БакIчинал чIурчIав дунни ххал бигьлагьисса масъалалул агьамшиврий, шагьрулул захIматшивурттугу хIсавравун ларсун, хаснура марххала бувсса чIумал ялун личайсса диялдакъашивурттай: «Гьай-гьай, хъунмасса марххала баву – ччимур шагьрулул ЖКХ-лул къуллугъирттансса захIматшивур, амма хъуншагьрулун захIматшиву шай ччимур чIумалсса дуниял дащаврия. КIиришиврий (гъинттул) диялдакъашивуртту дикIай электросетирдаву, кIинттул-захIматшиву шай газрал чулуха, марххала бувсса чIумал зун къадикIай транспорт. Властьран аьркинссар мукунсса тагьардан кьимат бищун укунмасса инсантурал пикри-зикрирду хIисавравун лавсун ва цалва хьхьичIсса масъалартту дузал буллан инсантуран къулайшивуртту хьунсса куццуй».
МахIачкъалаллал мэрнал буржру бартбигьлагьима Ризван ГъазимахIаммадовлул бувсунни коммунал къуллугъирттал давурттая. Мунал тIимунийну, цIанасса ппурттуву циняв зий бур марххала марцI бавриха ва, электроэнергиялул луртанну дакьин дурну, инсантурал къатравун чани булавриха.
Сергей Меликовлул хъуншагьрулул лябуккулул хIакъираву укун бувсунни: «ХIакьинусса кьини жулва хьхьичIсса масъала – шагьрулий инсантуран къулайшивуртту дузал давур: микку буван аьркинссар скверду, щюллисса кIанттурду къулайсса шагьрулул транспорт, ттизаманнул гостиницарду». Мунал мукунма бувсунни цукун бакьин бувну бикIан аьркинссарив хьхьирил зумардайсса кIанттурду.
Ризван ГъазимахIаммадовлул бувсунни гьашину шагьрулул лябуккулун хасну дансса давурттая.
Региондалул бакIчинал яла гъансса чIумал сакин бантIий бур Дагъусттаннал хъуншагьрулул лябуккулул программалуха ва дуван аьркинсса давурттаха зунсса группа. Программа бартдигьинтIий бур 2024-2025-ку шиннардий ва лахъи лагантIий дур 2030-ку шинайннин.
