[dropcap]Я[/dropcap]нварьданул 20-нний Дагъусттаннал ХIукуматрал Председатель Аьбдулмуслим Аьбдулмуслимов увкIунни Дагъусттаннал паччахIлугърал техникийсса университетравун. Мунащал архIал бивзунни вице-премьер Муслим Телякавов, вице-премьер Нариман АьбдулмутIалибов, ДР-лул дуккаврил ва элмулул министр ЯхIия Бучаев, Минцифралул каялувчи Юрий ХIамзатов, строительствалул ва ЖКХ-лул министрнал буржру бартбигьлагьима Александр Нестеров, Минсельхозрал, Минпромторграл, Минмелиоводхозрал, Къюмай тIутIул комитетрал каялувчитал ва цаймигу.

ХIукуматрал делегация хьунабавкьунни ректорнал буржру бартбигьлагьима Назим Баламирзоевлул, мунал хъамаллуран ккаккан бунни университетрал элмурдал центрду ва бигьалагайсса кIанттурду.

БакIрай делегация бивунни Ттизаманнул информациярттал технологиярттал центрданийн, микку ми кIул хьунни хьхьичIуннайшивурттал выставкалущал. Аьбдулмуслим Аьбдулмуслимовлун ккаккан дунни ДГТУ-рал студентътурал дуккан дурсса цIушиннарду. Университетрал элмулул ва инновациярттал давурттал проректор ХIамид Ирзаевлул тIимунийну, вуз хIадурну бур промышленностьрал идарарттаясса заявкарду кьамул дуллан.

Яла Аьбдулмуслим Аьбдулмуслимов ва ванащал ар­хIал бивзми бувкIунни кон­ференц-залданувун, ши­кку дунни хIасиллу ва вузрал хьхьичIунми зузалтран дуллунни паччахIлугърал наградартту.