Дагъусттаннал байран Москавлив

Дагъусттаннал байран Москавлив

Москавливгу Дагъусттаннал халкьуннал Цашиврул кьини хъун дуван Дагъусттаннал Постпредстволул сипталийну ккаккан дунни «Дагъусттаннал бусаларду» тIисса цIанилусса хъуннасса концерт.

Байрандалийн бавтIцири барча буллай, Постпред Владислав Тостюклул кIицI лавгунни Дагъус­ттан, чIяву миллатру бусса республика душивруцIун, ля­личIисса культура ва рув­хIанийсса ирс-ххазина бусса ца республика душивугу. Хъамаллуравух бия Аьрасатнал ПаччахIлугърал Думалул депутатътал Бийсултан ХIамзаев ва НурбахIанд НурбахIандов, Федерациялул Советрал сенатор Илияс Оьмаханов, Аьрасатнал Виричу МахIаммад Толбоев ва цаймигу машгьурсса, бусравсса инсантал, аьлимтал, жяматий­сса ишккаккулт. Гьурттушинна дунни ва мероприятиялий Постпредстволий зузисса жулва ла­кку душвавралгу, Москавуллал Культуралул центрданул вакилтурал ва Москавливсса «Дараччи» фондрал душвавралгу.

– Буниялттунгу ххуйсса байран хIадур дурну дия сакиншинначитурал. Республикалул халкьуннал культура ларай­сса душиву ккаккан дуллалисса, яргсса программа дия. Тиккура дия Дагъусттаннал усттартурал магьирсса каруннил дурмур: унцIукIуллал мурцIу бия авадан­сса, дия бархъаллал тIахIунттив, варакъив, къуттакьяпри, Да­гъусттаннал чичултрал луттирду. Ттуйгу чIиви-хъунсса бигар буссия ва концерт хIадур дувавриву, чIявусса агьалигу бавтIун, лайкьсса даражалийсса даву хьунни тIий, рязийну бия, ттулмур дакIнивугу ххаришиву дия, – увкунни Хъусращатусса Басират Билаловал.

Байрандалийн бавтIцири кIицI лаглай бия тукун лахъа-хъунну, чIявусса агьалигу бавтIун (азарунниха ливчусса агьлу), Москавлив цалчин дуршиву Дагъусттаннал халкьуннал Цашиврул кьини.

Аватар

Патимат Рамазанова

Заслуженный работник культуры РД

Читайте также: