ЧIумул ялун личин бувсса масъалартту

Региондалул управлениялул центрданул (ЦУР) август зурул 12-нния сентябрь зурул 11-ннийн бияннинсса чIумул мутталий ялун личин бувсса масъалартту ххал бивгьунни Дагъусттаннал БакIчинал ва ХIукуматрал Администрациялул хъунама Алексей ХIасановлул каялувшиврийну.

ЦУР-данул хъунама Ма­хIаммадсултан Аьбдуралимовлул бувсмунийн бувну, Да­гъусттаннал ТIабиаьт дуруччаврил министерстволул ва Гъуниннал райондалул администрациялул хIарачатрайну район ххиличIрурдацIа марцI дурну дур. Ахттиял райондалийсса Хкем тIисса шяраву ламу цIу бу­ккан бувансса хIукму бувну бур. Аьмну ва кIицI ларгсса чIумул мутталий ЦУР-данийн 6000 аьрза бувкIун бур, хъунмурчIин ми бур МахIачкъалалив, Каспийскалив, Буйнакскалив, Хасавюртлив ттукI лешлашаврицIун, щинал дузалшинна дакъашивруцIун ва ххуллурду ххуйну бакъашивруцIун бавхIусса. Бур цайми журалул масъаларттугу.

Масалдаран, Дарбантлив «Анаварсса кумаграл» машинартту чанну бур тIисса, Дагогниливсса азархана лащин­сса тагьарданий бур тIисса, Избербашрайсса детдомрал воспитанникнан, чIярусса шиннардий сияхIрайн лавсун унува, къатта къабуллай бур тIисса ва цаймигу журалул аьрзарду. Алексей ХIасановлул тапшур бунни вай циняв масъаларттах дагьайкун­сса къулагъас дуван.