ХхиличIрурдалсса буллансса завод

Вай гьантрай Москавлив хьу­сса «Российская неделя ГЧП» конгрессрай цIакь дурсса, Дагъусттаннай ххиличIрурдалсса буллансса шанма комплекс тIитIинсса кьутIилул хIакъираву «РЭО» ООО-лул гендиректор Игорь Гетмановлул бувсунни цIанакул документирттал паччахIлугърал ва экологиялул экспертиза буллай бушиву, хъинну хъирив лавну зий бушиву ва, октябрь зуруй экспертизалул хIасиллу дучIайхту, чIумуй даву дайдишинсса ниятрай бушиву.

Комплексру бувантIиссар МахIачкъала, Дарбант ва Хасавюрт шагьрурдай. Бувну къуртал буван ккаккан бувну бур кIира шинал мутталий, яъни 2024 шинал ахирданийннин. Шиккува дакIнийн бутан, Дагъусттаннай экологиялул оператор хIасул бувссия 2021 шинал октябрь зуруй, ххиличIрурду ххилаххаврил даву сантирайн рутан­сса мурад­рай.