НурмахIаммадлул арс Мяммаев НурмахIаммад
Вай гьантрай жуятува лавгунни хIурмат бусса зунттал чув, дакI-аьмал авадансса инсан, ЦIуликъяннал шяраватусса Мяммаев НурмахIаммад.
НурмахIаммад увну ур Ахъушиял райондалийсса ЦIуликъяннал шяраву 1927-ку шинал. Ванал хъунмасса захIмат бувссар чIивиния шийнай яттихIухчуну зий Буденыйнал, Орджоникидзел, 8-мур Мартрал цIанийсса колхозирттаву. Махъсса шиннардий, пенсиялийн укканнин, зий уссия ЦIуликъянинский тIисса колхозраву.
Ва захIмат ххирасса инсан ия, цува зузисса кIанай чув ухьурчагу, даврих гъира бусса ия.
ЯттичIа унува жагьилнийва хатIа хьуну, ва ччаннал ссуссукьусса ия. Мукун унувагу, багьайсса куццуй, цайминнаяр махъун къаагьну захIмат байва, давриву хьхьичIунну икIайва.
НурмахIаммадлул хъунмасса кулпатраву, оьрчIру-душру ххуйну хъунигу бувну, оьрмулул тIайласса ххуллийн буккан бувссар.
Ва гьалмахтал ххирасса ия, хъуниминнащалгу, мюрщиминнащалгу, гъанчунащалгу, ятиннащалгу, шяравуминнащалгу, шагьрулийминнащалгу, къуллугъчитуращалгу ца куццуй икIайва, дусшиву дуруччин кIулъя.
НурмахIаммад хIухчуну зий ивкIнугу, цачIава луттирду чан къабайва – ччарча тарихрал, ччарча культуралул.
Цала шяравалугу, жяматгу ххирасса ия. Хъинну буруккинттарай икIайва лакрал аьдатру, маз къабуруччаврил, жагьилтуран лакку маз къакIулшиврул.
НурмахIаммад аьпалухьхьун лагаврил пашманшивугу кIидачIлай, дакIнийхтунусса жижара буллай буру ванал душваврахь, арсваврахь ва махъсса цинявппагу мачча-гъаннахь.
ЦIуликъяннал жямат,
гьалмахтал, дустал
Хъуннасса кьурчIишивугу кIидачIлай, дакIнийхтунусса жижара буллай буру Мямма Мяммаевлухь, ванал аьзизсса ппу
НурмахIаммад
аьпалухьхьун лагаврийн бувну. Цал бунагьирттал аьпа баннав, рухI рахIатний дишиннав.
«Илчилул» редакция
Гъазалинал арс Закарьяев МахIаммад
ЗахIматсса цIуцIаврил къашавайгу ивкIун, оьрмулул 67 шинаву жуятува батIул хьунни ххаллилсса зунттал чув, ас-намусрал заллу, 1-мур ЦIувкIуллал шяраватусса Гъазалинал ва Марияннул арс Закарьяев МахIаммад.
МахIаммад увну ур 1955-кусса шинал 1-мур ЦIувкIуллал шяраву. Буттал шяраву школагу къуртал бувну, дуклан увххун ур Дагъусттаннал шяраваллил хозяйствалул институтравун. Ва къуртал бувну бур 1979-ку шинал. Зун айивхьуну ур гара шинал «Луч» тIисса совхозрай хъунама ветврачну. Армиялий къуллугъ бувну махъ зий ивкIун ур Ккуллал райондалул РК ВЛКСМ-рал 2-ма секретарьну, 1984-ку шинал ивтун ур цалчинма секретарьну. Муния махъ зий ивкIун ур АхIмад-Ханнул цIанийсса колхозрал председательну.
Шагьрулийн ивзун махъ зий ивкIун ур Ленинкантлив тIивтIусса МТС-рал Транспортрал станциялул организациялий, цал хъунама инженерну, яла директорну.
Цува чув, ци даврий зий ивкIун ухьурчагу, ванал хIалал бан бувну бур анжагъ хIурмат, кьадру-кьимат.
ЦIувкIуллал колхозрай каялувшиву дуллалисса шиннардий дурну дур чIярусса бусравсса давуртту. Ванал нани дурсса колхозрал цIагу диркIун дур райондалул хIурматрал улттуй.
ЧIярусса шиннардий зий бувсса захIматрахлуну ванан хIалал дурну дур диялсса хIурматрал грамотартту, барчаллагьрал чагъарду.
МахIаммадлул бивкIулул кьурчIишивугу кIидачIлай, жижара буллай буру кулпатрахь ХIурияхь, арсурваврахь, душваврахь, уссурваврахь, ссурваврахь ва махъсса мачча-гъаннахь.
Махънал оьрмурду лахъи баннав, МахIаммадлул рухI хъинний дишиннав, алжаннул ххари аннав, гьав нурданул дуцIиннав!
1-мур ЦIувкIуллал жямат,
дустал, даврил уртакьтал
