Сентябрь зурул 1-нний щалагу билаятрай цIусса дуккаврил шин дайдишай КIулшивурттал кьинилул байрандалун хас дурну. Республикалийсса цинявппагу кIулшиву дулаврил идарарттай кунма, мудангу лавайсса даражалийсса хIадуршиннаращал дайдишай цIусса дуккаврил шин ЦIуссалакрал райондалул шяраваллавусса цинявппагу школарттай.
ЦIусса дуккаврил шинащал оьрчIру барча бан Аьрасатнал Виричу Дмитрий Серковлул цIанийсса ЦIуминалийсса Шушиннал школалийн бувкIунни Республикалул Ишбажаранчишиврул ва инвестициярттал агентствалул каялувчи Артем Хрюкин, ЦIуссалакрал райондалул бакIчи МахIаммад-ХIажи Айдиев, райондалул кIулшивуртту дулаврил управлениялул хъунмур Светлана Къудаева, Шушиннал шяраваллил бакIчи Камил ХIажиев.
Шиккува бусан, гьашинусса шинал республикалий гьануцIакул къатри цIу дуккан даврин хас дурсса федерал программалул лагрулий ремонт буллай буссия Дмитрий Серковлул цIанийсса Шушиннал школа. Школалий цIуницIакул даххана дурссар магъи, гьануцIакулсса ремонтру дурну бакьин бувссар кабинетру, спортзал.
Ва кьини оьрчIру барча бан бувкIсса хъамаллурал лавайсса кьимат бивщунни школалул къатри цIу дуккан дуллай дурсса давурттан.
КIулшивурттал кьини оьрчIахь барча дуллалисса, цIусса дуккаврил шин дайдихьулул мажлис тIитIлай, ихтилат бунни школалул директор Шакират Абакаровал.
Дуккаврил ххуллий цалчинсса шаттирду ласласисса мюрщултрахь бувсунни цуксса гуж ва чани буссарив дуккавриву, чIа увкунни дуккавриву ва спортраву хьхьичIуннайшивуртту.
ДакIний личIансса, оьрчIахь насихIат бусласисса махъру лавхъунни Артем Хрюкиннул, МахIаммад-ХIажи Айдиевлул, Светлана Къудаевал.
