Вай гьантрай Дагъусттаннал Халкьуннал Мажлисрал Председательнал хъиривчу Камил Давдиев ивунни Ккуллал райондалийн, кIиккусса школарттай, социал объектирдай дуллалисса гьануцIакулсса ремонтрал давуртту ва цIу буккан буллалисса ххуллурдал тагьар ссайн дирну дурив ххал дигьин.
Камил Давдиевлущал объектирдал ялтту буккан бувкIун бия райондалул актив ва подрядный идарарттал каялувчитал.
Цинярдагу объектирдай щириркIуну най дия ремонтрал давуртту. Хъусращиял дянивмур даражалул школалий 99% дузал хьуну дия школа цIу буккан буллалисса давуртту, ми давуртту къуртал дан най дия дуккаврил шинал дайдихьулийнин.
Депутатнал хъиривмур аьрххи хьунни Ккуллал 1-мур школалийн. Шикку цIанасса ппурттуву увагу мукьа строитель зий ушиврийн бувну, хъуннасса нигьачIаву дия дуккаврил шинал дайдихьулийнин школалий дуллалисса ремонтрал давуртту къуртал дан къахьунссар тIисса. Мунийн бувну подрядчикнайн ва райондалул бакIчинайн тапшур бунни ккаккан дурсса чIумуйн бияннин анаварсса мутталий ремонтрал давуртту къуртал дансса чаранну лякъин.
Камил Давдиев мукуна ивунни «Культура России» тIисса миллатирттал проектрал лагрулийн бувну цIу буккан буллалисса Ккуллал шяравусса Культуралул къатрал идаралийн. Шикку ванал кIицI лавгунни Культуралул къатри цIу дуккан дуллалисса давуртту ккаккан бувсса графикрайн бувну къуртал дуван най душиву.
Мукунна, ккаккан дурсса чIумуй къуртал дан най бур Ккуллал шяравухсса ххуллурду цIу буккан буллалисса давуртту.
