Августрал 16-нний Дагъусттаннал ХIукуматрал Председательнал хъиривчу Рамазан ЖахIпаровлул каялувшиврий хьунни ххуллурдай мюхманшиву дуруччаврил комиссиялул батIаву.
Республикалул ххуллурдай 2022-ку шинал 6 зурул мутталий хьусса апатIирттал хIакъираву махъ лавхъунни ДР-лул МВД-лул Госавтоинспекциялул управлениялул хъунаманал буржру бартбигьлагьима Мурад ХIусмановлул. Мунал тIимунийну, 2021-ку шинал республикалий биттур дурну диркIун дур «Ххуллурдайх заназаврил мюхчаншиву» тIисса региондалул проектрал ккаккияртту. Мунал бувсунни ми ккаккаяртту цукунсса диркIссарив. Амма, му мукуннугу, цIанасса ппурттуву машинарттал апатIру шаврия инсантал чIявуну литIлайнма бур. «2022-ку шинал 6 зурул мутталий Дагъусттаннай сияхIрайн лавсун бур 655 ххуллул апатI, ивк1уну ур 109 инсан, цIунцIияртту хьуну дур 910 инсаннайн.
Июльданий тIурча, ххуллул апатIру ва миннуву ливтIуми гьарза хьуну бур — апатIру 8% ва ливтIусса 22%. Гьашинусса шинал, ихтилатчинал тIимунийну, гьарза хьуну дур ххуллурдайсса апатIирттаву оьрчI-бакIуннайн цIунцIияртту шаву. ХIусмановлул бувсунни му тагьар ххуй-хъин даншиврул МВД-лул, Дуккаврил ва элмулул министерствалул дуллалисса давурттал хIакъираву.
Ххуллурдай апатIирттал инсантал литIлатIаву чан даншиврул Транспортрал министерствалул дуллалисса давурттал хIакъираву бувсунни министрнал хъиривчу МахIаммад ТIагьировлул. Мунал тIимунийну, гьашину ххуллул апатIру хъанахъисса кIанттурдай дуван ккаккан дурсса давурттан итадаркьуну дур 366 млн къурушру. Ми давуртту бартдигьаврил контрактругу чирчуну дур. Гьашину октябрьданий цинярда давуртту дурну бакIуйн дуккан дантIий дур.
БатIаврий махъру лавхъунни мукунма ДР-лул цIуллушиву дуруччаврил министр Татьяна Беляевал, ДР-лул МЧС-рал хъунаманал хъиривчу Сабир МахIмудовлул ва цайминналгу.
Ихтилатирттая махъ вице-премьер Рамазан ЖахIпаровлул дунни цаппара тапшурлугъру ва ми ларсунни батIаврил протоколданийн.
