Экстремистътурал кьюкьа ххярххун диркIссар ЦIумадиял райондалийн 1999-ку шинал августрал 2-нний. Гагатлиял шяравалличIа миннал ва жула полициянал зузалтрал дянив хьуссар унгу-унгусса биту-ххиту. Кумагран бучIан бувну бивкIссар МВД-лул гужру. Му талатавриву боевиктал лихълахъи бувссар.
ЦIумадиял райондалийсса операциялий каялувшиву дуллай ивкIссар виваллил иширттал министрнал хъиривчу МахIаммад Оьмаров, дяъвилул циняв иширттай каялувшиву дуллай ивкIссар ДР-лул виваллил иширттал министр Аьдилгерей МахIаммадтIагьиров.
Тай гьантрай хьуссар ДР-лул ПаччахIлугърал Советрал, Халкьуннал Мажлисрал ва ХIукуматрал чярхнийсса батIаву. Микку ххал бивгьуссар ЦIумадиял райондалий хьусса тагьарданул ва му цалийн дуцаврил чараннал масъала. Мува масъала ххал бивгьуссар МахIачкъалаллал администрациялий хьусса батIаврийгу.
АьФ-лул МВД-лул Виваллил аьралуннал 102-мур бригада бувкIссар ЦIумадиял райондалийн августрал 4-нний, 150 боевикнал Агъваллал шяраваллийн гьужум бувсса чIумал. Миччагу боевиктал лихълахъи бувссар махъунмай Чачаннавун.
Августрал 7-нний Хаттаб бакIчисса боевиктурал кьюкьри ххярхссар Бущихъиял райондалийн, миннал канихьхьун ларсун диркIссар цаппара шяраваллу. Дагъусттаннал инсантурал сакин дуллан бивкIссар ополчентурал кьюкьри. Гьарца дагъусттанлув тIиссакссагу хIадурну ивкIссар ярагъгу кIунттихьну дуручлан цалла аьрщи, цала буттал улча, цалла Ватан.
Бандитътурал кьюкьрайн къаршину бавцIуссар шяраваллал жяматру, РОВД-лул батальонну ва дазул заставартту. Дяъвилул ишру хъанахъисса райондалийн бучIан бувну бивкIссар Буйнакскаллал 136-мур бригадалул ва СОБР- алул подразделенияртту. Ччясса мутталий АьФ-лул Обороналул министерствалул, Ухссавнил Ккавкказуллал аьралуннал округрал чярхний хъунисса самолетирттай дучIан дурссар аьралуннал частьру МахIачкъалаллал аэропортрайн, яла вертолетирттай ми бивчуссар дяъвилул ишру хъанахъисса кIанттурдайн. Хъуннасса патриотшиву ккаккан дурссар тай гьантрай аьралуннаву къуллугъ буллалисса дагъусттанлувтурал. Минналгу, ополчентуралгу ккаккан дурссар дагъусттанлувтуран лайкьсса чувшиву ва виричушиву, кьянкьашиву ва сисаву, Ватандалул цIаний жан дулунгу хIадурну бушиву.
Сентябрьданул 5-нний 6 ссятраву боевиктал Чачаннал чулухату ххявхссар ЦIуссалакрал райондалийн. Блокпостирдай миннал хьхьичIалу кьуркьун диркIссар Липецкаллал ОМОН-далул ва райондалул виваллил органнал зузалтрал. Ми талай бивкIссар виртталну. Муслим Даххаев бакIчину миннал ккаккан дурссар циняв махIаттал хьун бувсса къучагъшиву.
Хаттаблул ва Басаевлул кьюкьраща бювхъуну бивкIссар канихьхьун ласун Шушими, Аьхъар, Гьамиящи, ТIюхчар ва райондалул центр. Къизгъинсса талатавуртту хьуну диркIссар «Телевышкалул» лахъшиврий. Увагу 6 милица ивкIссар кIикку боевиктуращал талай. Миннавух ивкIссар полициянал лейтенант Халид Мурачуев. Январданул 31-нний Ккуллал шяраватусса Халид Мурачуевлун ва мунащал архIал талай ивкIсса ЦIуссалакрал шяраватусса Мутай Исяевлун дуллуссар Аьрасатнал Виричунал цIарду.
Сентябрьданул 16-нний 1999-ку шинал бандитътурал кьюкьри ххит дуккан дурссар ва дардагъил бувссар.
