Августрал 14-нний МахIачкъалалив Дагъусттаннал региондалийсса «Справедливая Россия – ЗА ПРАВДУ» партиялул отделениялул каялувшиннаралу хьусса пресс-конференция хас дурну дия Аьрасатнал медицина ххуй даву мурадрайсса чаранну лякъаврин.
Ваний гьуртту хьунни Дагъусттаннал региондалийсса «Справедливая Россия» партиялул отделениялул председатель, ДР-лул Халкьуннал Мажлисрал Председательнал хъиривчу Камил Давдиев, «Справедливая Россия – ЗА ПРАВДУ» партиялул член, ДР-лул лайкь хьусса хIакин, МахIачкъалаллал 3-мур поликлиникалул заведующая Марина Исламова, ДР-лул Халкьуннал Мажлисрал депутат, СКФО-райсса «Молодежь Справедливой России» тIисса жагьилтурал суккушиннарал координатор Марат Аьлияров ва республикалул СМИ-рдал журналистътал.
Шиккува кIицI лаган, ва мурадрайсса пресс-конференцияртту архIалла дуллай дуссар билаятрайсса «Справедливая Россия – ЗА ПРАВДУ» партиялул цинярдагу отделениярттай.
Пресс-конференция дайдихьлай Камил Давдиевлул кIицI лавгунни, партиялул агьаммур тезис «Миллатрал цIуллушиву – билаятрал цIуллушиву» тIисса душиву.
«Ванийну тасттикь хъанай бур хIакьинусса кьини билаятрай инсантурал цIуллушивруяр хьхьичIунсса цичIар дакъашиву. МуницIун бавхIуну аьркинну бур медицина къулай даву мурадрайсса чаранну ляхълан. ХIукуматрал медицина цинявннан аьмсса дикIан аьркинссар. ХьхьичIра-хьхьичI гьаз дан аьркинссар хIукуматрал медициналун итадакьайсса арцу. Жул партиялул вай сиптарду цимилгу хIукуматрал каялувчитурал хьхьичIун ласлайнна дуссар», – увкунни Камил Давдиевлул.
Хъирив ихтилат бунни Марина Исламовал.
«Пандемиялул аьлтту дунни жула медициналувусса цинярда диял дакъашивуртту. Исват хьунни медициналул идарарттан хIукуматрал бюджетрава итадакьлакьисса арцу диял хъанай дакъашиву. 80% медициналул бюджетрал най бур зузалтран харжру булаврих, мунийн бувну диял хъанай дакъар оборудованияртту машан ласунсса арцу. ХIакинтурал базовый окладру бур 16 азарда къуруш, дянивсса медперсоналданул 9 азарда къуруш. Жул партиялул тIалавшинна дур вай окладру хъуни баву мурадрайсса. Му бакъассагу, медициналул вузирдавугу чIяву бан багьлай бур бюджетралми кIанттурду», –увкунни Марина Исламовал.
Марат Аьлияровлул кIицI лавгунни, цаппара регионнай медработниктал бацIланшиврул, чарабакъа аьркинну бушиву миннансса харжру лахъ бувансса чаранну ляхълан.
Ахирданий партиялул спикертурал жавабру дуллунни журналистътурал суаллахьхьун.
Медициналуву коррупция духлаган даврил хIакъиравусса суалданухьхьун жаваб дуллай, Камил Давдиевлул кIицI лавгунни хьхьичIва-хьхьичI хIакинтуран лайкьсса харжру бишин аьркиншиву.
