Дагъусттаннал премьер-министр гьуртту хьунни учительтурал батIаврий

Дагъусттаннал премьер-министр гьуртту хьунни учительтурал батIаврий

Августрал 23-нний МахIачкъалалив хьунни кIулшивурттал аралул пишакартал гьурттусса шинал хIасиллу
дуллалисса хъуннасса батIаву.

Укунсса батIаву жулла республикалий дувайссар гьарца шинах, цIусса дуккаврил шин дайдишин хьхьичI гьантрай.
Ваний шинал мутталий хьусса цIушиннардаясса ва вания гихуннай дан багьлагьисса давурттая бусласисса ихтилатращал гьуртту хьунни Дагъусттаннал ХIукуматрал Председатель Аьбдулмуслим Аьбдулмуслимовгу.
Гьашинусса августрал батIаву хьусса кьини тIайла дарцIунни Дагъусттаннал БакIчиначIасса Элмулул ва кIулшивурттал советрал батIаврийнгу.
Учительтурал батIаву дайдишин хьхьичI Аьбдулмуслим Аьбдулмуслимовлул ххал дурунни МахIачкъалаллал оьрчIал садикирттал, «Альтаир» центрданул, Юнармиялул, ТОК-совцынал  ва  учительтурал цала дуклаки оьрчIащал архIал дурсса давурттал выставкарду ва экспозициярду.
Хъирив Аьбдулмуслим Аьбдулмуслимовлул баян бувна батIаву тIиртIушиву ва цалчин республикалул педагогтурал хьхьичI онлайн-режимрай махъ лахъан ихтияр ласлай ушиву Аьрасатнал Минпросвещениялул бакIчи Сергей Кравцовлул. Дагъусттаннал учительтал ялун нанисса цIусса дуккаврил шинащал барчагу бувну,  ванал кIицI лавгуна, ларгмур шинал педагогтурал хьхьичI бивхьуну бивкIсса буржру дакI марцIну биттур бувшиву ва ялун нанисса цIусса шиналгу вайва масъаларттацIун уттимигу мукунма щаллу бансса вихшала дихьлай бушиву.
Сергей Кравцовлул мува куццуй кIицI лавгуна, гьашину школарттай хъуннасса къулагъас дикIантIишиву учительтурал оьрчIан  кIулшивуртту дулаврил даражалух.
– Гьашину «Образование» тIисса проектрал агьаммур мурад бикIантIиссар дунияллий ххуйну кIулшивуртту дуллалисса ацIра хIукуматрал сияхIравун Аьрасатгу багьан бансса хIарачат бансса, –увкуна Минпросвещениялул хъунаманал.
Хъирив махъ лахъан ихтияр ларсъсса ДР-лул ХIукуматрал Председатель Аьбдулмуслим Аьбдулмуслимовлул дакIнийн бувтуна, Дагъусттаннал БакIчи Сергей МеликовлучIа ларгмур шинал хьусса Советрал батIаврий, 2022-ку шин баян бувну бивкIшиву КIулшивуртту дулаврил шинну. Ва шинал лагрулий республикалул чIявусса шагьрурдай ва щархъаву дурссар агьамсса давуртту. Ххал диргьуссар кIулшивуртту дулаврил программарду ва гьунар бусса оьрчIащал зунсса шартIру. Мукунна кьамул дурссар 2030-ку шинайнсса кIулшивуртту дулаврил Концепция.
Аьдулмуслим Аьбдулмуслимовлул цала ихтилатраву мукунма кIицI лавгуна, республикалий чара бакъа хIасул дан багьлай бушиву оьрчIан дуккаврих гъира бутансса шартIру. Шиная шинайн укунсса шартIру щурущи дуллайгу бушиву. Масалдаран, вай махъсса кIира шинал ЕГЭ-рал 100 баллу лавсъсса оьрчIангу, миннахь дарсру дирхьусса учительтурангу дулай­ссар арцу. 100 азарда къуруш дулайссар цумур-цагу ЕГЭ-лул 100 балл лавсъсса оьрчIан. Гьашину мукунсса хьуну бур 30 дуклаки оьрчI ва 3 педагог.
Бувсуна ХIукуматрал Председательнал гьашину кунма цал архIал чIявусса школартту ва оьрчIал багъру бакьин буллалисса давурттугу ттинин Да­гъусттаннай цайми шиннардий къадиркIшиву. Гьашину, масалдаран, хIукуматрал личIи-личIисса программардал кумаграйну, республикалий буллай сукку хьуну бур 103 школа. Вай бувну, бакIрайн бувккукун, 40 азараксса дуклаки оьрчIансса кIанттурду хьунтIиссар. Мукунма буллай бур 8 азараксса мюрщултрансса 56 детсад. Вай дуллалисса объектирдава гьашинува оьрчIру кьамул бан ккаккан бувну буссар 30 цIусса школалий ва 44 детсадраву. Сентябрьданул 1-нний Дагъусттаннай тIитIинтIиссар 1606 дуклаки оьрчIансса 4 школа ва 2360 чIивитIунсса 15 детсад.
Аьбдулмуслимовлул бусаврйну, гьашину школарттай хъуннасса къулагъас дикIантIиссар оьрчIру тарбия баврилмур даврихгу. Ванийн бувну, дуккаврил шин дайдишаврищал, гьарцагу школалий  итантIиссар тарбиялулмур даврил ялув авцIуну зунтIисса директорнал маслихIатчи. Ва цIусса къуллугъ хъанахъиссар школарттай.
Мукунма республикалий тIитIинтIиссар «Точка роста» тIисса центрданул уттизаманнул кIулшивуртту дулайсса 171  центрдугу. Каспийскаллал 13-мур школалий мукунма щурущи бантIиссар «Кванториум» оьрчIансса технопарк.
Республикалий тIивтIусса «Альтаир» тIисса оьрчIансса ва чIаважагьилтурансса центрданул гьанулий щурущи бувну бур 41 спортплощадка, 11 футболданул мюрщи майданну ва унгу-унгуну щурущи дурну дур «Футбол в школе» тIисса проект.
БатIаврий Аьбдулмуслим Аьбдулмуслимовлул мукунма бувсуна «Земский учитель» тIисса программа цукун щурущи дурну дуссаривгу. Ва дуккаврил шин дайдишаврищал республикалул районнал щархъавусса школарттайн зун учIантIиссар 92 учитель. Вайннансса хIаллихшиннардавасса агьаммур хъанахъиссар гьарнан ца-ца миллион арцул булаву.
Ахирданийгу ялун нанисса цIусса дуккаврил шинащал учительтал барчагу бувну, ДР-лул ХIукуматрал Председательнал чIа увкуна тIайлабацIу ва оьрчIащалсса даврихсса гъира такIуйгу къалещаву.

Читайте также: