КьурванмахIаммадлул арс ХIусайнов МахIаммадрамазан
Июль зурул 23-нний, тамансса хIаллай къашавайгу ивкIун, жуятува лавгунни 1-мур ЦIувкIуллал шяраватусса захIматрал ветеран, цала оьрмулулгу, захIматралмургу ххуллу бусравну бивтсса, КьурванмахIаммадлул ва ПатIиматлул арс ХIусайнов МахIаммадрамазан.
Увссар МахIаммадрамазан 1-мур ЦIувкIуллал шяраву 1946-ку шинал. ЧIивину унува буттагу ивкIуну, ятинну ливчIссар.
1-мур ЦIувкIуллал школалий 8 классгу къуртал бувну, дуклан увхссар Щурагьиял педагогический училищалувун. Училище къуртал байхту, бувккуссар Дагъусттаннал пединститутрал математикалул факультет. Зун айивхьуссар ЦIуссалакрал райондалийсса Шушиннал шяраву дарсру дихьлай. Яла Ккуллал райондалийсса Хъювхъиял шяраву математикалул дарсру дихьлай ивкIссар. 1972-ку шинал лавгссар аьралуннаву къуллугъ бан. Армиялия зана хьуну махъ зий ивкIссар буттал шяраву, 1-мур ЦIувкIуллал дянивмур даражалул школалий, 50 шинай зий ивкIссар МахIаммадрамазан му даврий.
Ва ия хIал бавкьусса, хIалимсса, дустал ххирасса, давриву хьхьичIун ливчусса инсан. Дуклаки оьрчIангу, выпускниктурангу, цащала зузиминнангу хъинну ххирая.
МахIаммадрамазаннул хъунигу бувну, дуккингу бувну, щаллу бувссар 3 арс ва 2 душ.
Ва лайкь хьуссар чIярусса хIурматрал грамотарттан, барчаллагьрал чагъардан. Ванан дуллуссар «Почетный работник образования Российской Федерации» тIисса цIа.
Хъуннасса кьурчIишиву кIидачIлай, жижара буллай буру ванал кулпат Умаматлухь, оьрчIахь, душваврахь, ссурваврахь, махъминнахь. Цал бунагьирттал аьпа баннав, махъминнал оьрмурдай барачат бишиннав, алжаннул ххари аннав.
1-мур ЦIувкIуллал жямат
Ширванинал душ Аьлилова ПатIимат
Вай гьантрай дунияллия лавгунни ххаллилсса, дакI-аьмал хъинсса, жяматран бусравсса хъамитайпа, Бярнихиял шяравасса Ширванинал душ Аьлилова ПатIимат.
Аьзизсса нину аьпалухьхьун ларгсса кьурчIишиву кIидачIлай, жижара буллай буру арсваврахь АьбдуллатIиплухь, Аьвдулмажидлухь, душваврахь ПатIиматлухь, Булбуллухь, Ххадижатлухь, Иринахь, Залинахь. Имандалий лавгун лякъиннав, алжаннул ххари баннав, махъсса цинявннахьхьун цIуллушиву дулуннав.
Чапаево шяраваллил жямат
* * *
Цукун рахIат дувави
Ятин хьусса ттулла дакI?
Цукун кьамул бувави
Нину дакъасса оьрму?
Аьрххилийн букканнин хьхьичI
БувкIссияв вичIан, бавай:
Уттигу асарну дур
Ххира бувсса вил кару!
Дуниял дур гъав ларгун,
Чях буллуну гъарал дур,
Ттул дакIгу дур гъав ларгун,
Яругу бур хъювхъу тIий.
ЦIаххаева Ххадижат
Чувшиврий жан дуллусса
Алик Гъазиевлул аьпалун
Гьавалуву – дувсси, хьхьуниву – чIутIи,
МурчIи хьусса ссавгу иттав дуруглай…
Ккуллалул увтманал цIа лиххан дайма
Акъахьурча жагьил, ухьурча агьил,
Мунан бувчIлачIиссар оьрмулухсса мякь:
Ссавниясса чаннах, лагмасса урттух,
ЧIапIай– щинал кIунтIах, зурул нурданух,
Ччиссаннуйн ка щусса чурххал зурзулух…
Шанавун ларгсса ссав, цIан ва пахъдагьру.
Аьрщарайх тIивтIусса вил чурх – зяй чару.
УрчIах гьаз хьуну дур бюхттулсса гьайкал,
Танил кIучI дурну дур цила махъ думур.
Гузат-къаралданий вих бур ялугьлай
Я аьсивсса бивкIу, я ттигу оьрму.
Вана ва къатIагу – оьрмулул лишан,
ХхялчIигу ххядурккун, чаннайн ливчусса.
Ккавкказнал зунттурдув, кьабивкIсса цанну,
Ссавнил ва Лухччинул дазуй бавцIуну?
Ляхъан бувсса Заннал зухь бусанхьуви
Оьрмулул, бивкIулул мяъна ссавурив.
Цукунсса цинцилттай буцайсса бурвав,
Дахьва буллу оьрму бяличIан байни?
«Дяъвилий литIайсса так арамталли,
ХIакьсса чувнал ххуллу язи бувгьуну».
Ккавкказуллал зунттал кIира дур жуав:
Му я бюхттулшивур, лахъну гьаз айсса,
Алмасрал пар бусса Эльбрусрал бакIайн.
Ягу аскишивур, цIа духлагайсса.
КутIасса бивкIнугу оьрмулул лахIза,
БивкIу бакъашиву – мугу оьрмури,
ДакIниву духьурча буттахъал Ватан,
КъюкIливу ухьурча Залгу, имангу.
Миясат Муслимова
Таржума Роза Эльдаровал
Ттул къатлул
чанна чирахъ
Арснал ХIамидлул аьпалун
Гьантта лаглай, ссят лаглай,
Жу вил мукьцIал лахъарду,
Вил кьурчIисса бивкIулул
Кьуру кьюлтI чин къахъанай.
ЛивчIунну мякьнува жу
Вил авурсса сипатрах.
Чаннану бивкIсса ужагъ
Утти цIаннал лавсунни.
Лева-левщун лавгссарав,
Ттул къатлул чанна чирахъ,
Хъухъалав ккурчIнил авур
ДучIан дай ххира ХIамид.
ЛухIи гьаттал гъунттулу
ЦIаннащал аьлахълахъу.
Нагу, вил чаннах луглай,
ЦIан хьхьунивух зананна.
Бюхттул зунттал бакIаву
Жан дуллусса ххира арс,
Тти ттунма на ци бави,
Хъама цукун итава!
Дандамаева Жумяъ,
ш. ГьунчIукьатIи
Абсаруттиннул арс
ШТАНЧАЕВ
ШИРВАНИ
Вай гьантрай оьрмулул 80 шинаву дунияллия лавгунни жул щарнил хъуначутурал кьюкьлувасса Штанчаев Ширвани Абсаруттиннул арс.
Увну ур ва ГьунчIукьатIрал шяраву 1941-ку шинал. Душанбелий школагу къуртал бувну, аьрали къуллугъгу лавхъун махъ Ширвани дуклан увххун ур Чемкентуллал медучилищалувун ккарччал техникнал пиша лахьхьин. Дурккуну махъ ва зун увцуну ур Душанбе шагьрулул къуллугъчитал хъин бувайсса поликлиникалийн.
Ванийгу гьашиву къадурну, 1980-ку шинал Ширвани дуклан увххун ур Таджикнал паччахIлугърал шяраваллил хозяйствалул университетравун. Му къуртал бувну махъ зий ивкIссар Душанбе шагьрулул иммунно-генетикалул лабораториялул хъунаману. Таджикнава буттал миналийн зана хьуну махъсса цаппара шиннардий зий ивкIссар шяраву зоотехникнугу.
Ширвани икIайва хъинну дин-чак дусса, диндалул циняв буржру биттур буван хIарачат бусса чув. Гьарцагу бусурманчунал чIаку мурадран ккаллисса хIаж бавугу ванаща бювхъуссар биттур бан 2013-ку шинал.
КьурчIишиву кIидачIлай, жижара буллай буру ванал уссур-ссуннахь, агьлу-авладрахь. Имандалий лавгун лякъиннав, бунагьирттал аьпа баннав.
ГьунчIукьатIрал ккурандалул цIания ХIажибутта ХIусайнов
