Дагъусттаннал ва Ингушетиянал тIайла бувксса гуманитар кумаг бивссар Донбассрайн. Ва ххуйсса даврил сиптачитал бур Федерациялул Советрал члентал Илияс Умаханов ва Белан Хамчиев, ПаччахIлугърал Думалул депутат АьбдулхIаким ХIажиев.

Аьмну Донбассрайн тIайла дурккун дур дуки-хIачIиялул 100 тонна: дикIул консерварду, макаронну, качар, иникьали, ахънилсса. Кумагращалсса ххюва хъунма машина бивссар, мукьва — Херсоннайн, ца тIурчарив – дагъусттанлувтал-росгвардейцы къуллугъ буллалисса Энергодардайн.

Кумаг биян буван бувкIсса сенатортурал бувсунни «Единая Россиялул» уттигу Донбассрал агьулданун кумагру буллантIишиву.
– Жуща кумаг Армянскалийн биян бувну кьабитан хъанай бия, амма жунмагу Донбассрайн биян ччай бия, ватандалул цIаний талатисса вирттаврахь ва кIанттул агьулданухь барчаллагь учин, – увкунни Илияс Умахановлул.

АьбдулхIаким ХIажиевлул кIицI лавгунни Донбассрал агьулданун кумаг буван ччай бушиву Аьрасатнал гьарца регион, гьарца шагьру ва шяравалу, хасну Дагъусттаннаягу кумаг буллай бушиву ва мукьахунмайгу буллантIишиву.

– Уссурвалсса агьлу балаллул ппурттуву цивппалу къакьабитантIиссар. Дагъусттаннай гуманитар кумаг батIаврил, тIайла буккаврил даву сантирайн руртун дур Дагъусттаннал БакIчи Сергей Меликовлул хIарачатрайну. КутIасса чIумул мутталий датIин аьркинмургу дартIун, тIайла дуклай бур, ми чIумуй мюхтажминначIан диллай дур, – увкунни депутатнал.