А. Къапиевлул цIанийсса Лакрал паччахIлугърал музыкалул ва драмалул театрданул ларкьунни 85-мур сезон. Республикалийсса эпидемиологиялул тагьар сававну, онлайн-кьаралданий хьунни Венецианнал драматург Карло Гольдонил «ХIаз бизансса иш» тIисса пьесалул премьера.

[dropcap]П[/dropcap]ремьералул тIайланнасса трансляция дия Инстаграм соцсетьрал Лакрал театрданул лажиндарай(@lakral_teatr). Режиссер Дагъусттаннал лайкь хьусса артист МахIаммад Сурхатилов.
Спектакльдануву агьамми роллу дургьуну бия Дагъусттаннал халкьуннал артист Шамсуттин Къапланов, Дагъусттаннал лайкь хьусса артистка Зинаида Чавтараева, Рамил КьурбанмахIаммадов, Рукьижат МахIаммадова, Зульфия Архилаева, Малик Кьурбанов.

Театрданул администрациялул бусаврийн бувну, коронавирусрал инфекция сававну республикалий хIасул хьусса эпидемиологиялул захIматсса тагьар хIисав дурну, гьашину театрданул труппалул дукьан дурну дур Лакрал щархъавунсса гастроллу.

[dropcap]Ц[/dropcap]Iанасса чIумал труппа зий бур ДР-лул БакIчинал Грант дурххуну бихьлахьисса Совет Союзрал Виричу МахIаммад ХIажиевлул оьрмулиясса спектакльдануха. Пьеса чивчуну бур Марат Шахмановлул. Режиссер – Дагъусттаннал халкьуннал артист Аслан МахIаммадов.