ХIакьинусса кьини (июльданул 29) Аьрасатнал спортсментурал ларсунни 8 мусил,
11 арцул ва 9 чарвитул медаль. Мусил медаллу хIисавравун ларсун, цалчин кIанай бур
Китай, (15-7-9), кIилчин – Япония (15-4-6), шамилчин – США (14-14-10),
мукьилчин – Аьрасат (8-11-9), ххюйлчин – Австралия (8-2-10).

Альберт Батиргъазиев бокс­рай ххув хьунни доминиканчу Алекси де ла Крузлуяр, циняв судиятурал чIурду ца хьуну, ув­ккунни четверть финалданийн. Жула боксер Олимпиадалул тIуркIурдай цалчин уклай ур.
Четверть финалданий августрал 1-нний ва ччалли уккантIий ур Монголнавасса дунияллул чемпионатрай 3-мур кIану бувгьусса ва 2016 шинал Олимпиадалий гьуртту хьусса Цендбаатар Эрденэбатиннущал.
Зенфира МахIаммадаьлиева боксрай, олимпий тIуркIурдай цалчин гьуртту хьуну, финалданул 1\8-лий ххув хьунни США-нал боксер душнияр. Утти жулва спортсменка ччалли буккантIий бур июльданул 31-нний. Земфира хъанахъиссар кIийла дунияллул чемпион.
Испаниянахлу уклаки­сса Да­гъусттаннал боксер Гъа­зи­махIаммад Жалидов ххув хьу­нни Австралиянавасса Паусо Акусояр .
Муслим ХIажимахIаммадов боксрай увккунни Олимпиадалул четверть финалданий, му ххув хьунни Алжирнал вакилнаяр. Утти му ччалли уккантIий ур июльданул 30-нний. Мунал муттаэ хьуну ур Аммар Абдулджаббар (Германия).
Канадалухлу уклакисса Да­гъусттаннаясса гьузузала Руслан Гъазиев гьурттусса Канаданал мукьа гьузузалал бувгьунни 4-мур кIану. Русланнун дур 21 шин, му ур Ххунзахъиял райондалиясса, яхъанай ур Канаданаву, амма дуклай ур США-наву Огайоллал университетрал экономикалул факультетрай.
Аьрасатнал фехтованиялул цачIундур командалул член хъанахъисса Айзанат Муртазялиева шпагалий буклай, полуфиналданий бух хьунни Китайнал душнияр. Муниннин Айзанат ххув хьунни 4 душнияр.