Владимир Путин ва Сергей Меликов хьунабавкьунни

Владимир Путин ва Сергей Меликов хьунабавкьунни

Август зурул 19-нний видеоконференциялул кьяйдалий Аьрасатнал Президент Владимир Путиннул ва Дагъусттаннал БакIчинал къуллугъ чIумуйну бартбигьлагьисса Сергей Меликовлул республикалул социал-экономикалул тагьар ххал дигьлагьисса ихтилат хьунни.
Меликовлул барчаллагь увкунни Аьрасатнал хъунаманахь Дагъусттаннайсса тагьарданул хIакъиравусса докладрах вичIи дишинсса чIун ля­ъаврихлу. КоронавирусрацIун дархIусса тагьардания буслай, Меликовлул кIицI лавгунни аьмну Дагъусттаннай уттинин азар тасттикь хьусса 40 азара иш хьушиву, азар ххал дигьлагьисса тагьар сантирайн дутаншиврул республикалул бюджетравагу 67 миллион ялунгу личIи бувшиву. Бувсунни зунттал районнайгу КТ — исследованияртту дуллай бушивугу, захIматсса къашайшалт шагьрурдайсса азарханардайн санитар авиациялул биян бувайшиву, вакцинарду бувайсса 86 стационар пункт ва 58 мобил пункт бушиву. Бувсунни ковидгу дахчилай душиву республикалийсса социал-экономикалул тагьар гьаз дуван. МуницIухва чIярусса шиннардий лахъи лавгсса къювусса масъаларттугу бушиву.
– ХьхьичIва-хьхьичI кIицI лаганна инфраструктура лащин­сса душивруцIун бавхIуми ма­съалартту – щинал, канализациярдал, ттукIрал ва газрал. Хьхьиривун чапалсса щин нанаврийн бувну ва щин марцI дувайсса система сантирайн рутан къабюхълахъаврийн бувну, республикалул турист потенциал щаллуну ишла буван, багьайкунсса хайр ласун бюхълай бакъар. Дурния махъ мархлуцIакулсса ремонт къа­ккарксса объектру дур щинал дузалшинна дуллалисса. Мунияту гьанумур къулагъас дуван багьлагьисса масъаларттавух бур МахIачкъалаллал очистные сооружениярдал реконструкция дуваву ва ми гьарза-гьарта даву, – увкунни Меликовлул.
Ванал Путиннухь тавакъю бунни 2022 шиналсса федерал бюджет цIакь буллалийни, паччахIлугърал программалул гьанулий Дагъусттаннан кумаг буван кIай ялув кIицI лавгсса масъалартту бартбигьин, канализациялул коллектор дувансса кумаг буван.
Гьаз бунни Меликовлул докладраву хъу-лухччив щинал дузал даврил, чавахъирттал хозяйство сантирай зузи даврил, федерал ххуллурду бакьин баврил ва цаймигу къювусса ма­съарартту. ЧIурчIав дунни республикалийсса водоемру щинал ххуйну дузал баврийну балугъирттал производствагу гьаз дуван хьунтIишиву.
Аьрасатнал Президентнал кIицI лавгунни хIукуматрайн тапшур бувантIишиву хьхьичI­ххуттайн лавсъсса масъалартту бартбигьин кумаг буван, республикалийсса инфраструктуралул модернизация бартдигьин. Расул ХIамзатовлул 100-шинал юбилейрайн Дагъусттаннайн оьвтIий буру тIисса Меликовлул предложениялул хIакъиравугу, Путиннул увкунни: «На мудангу личIиссава асардащал учIара Дагъусттаннайн. Нанияра пикри буваннуча юбилей лайкьсса даражалий кIицI лагаврил хIакъиравугу, циван чирча, Расул ХIамзатов Дагъусттаннал, Яруссаннал билаят бакъассагу, щалвагу Совет Союз, Аьрасат машгьур бувсса инсанни.

Аватар

Патимат Рамазанова

Заслуженный работник культуры РД

Читайте также: