Лакрал агьалинайнсса лабизаву

Дунияллул ухссавнил дазу-зуманив дуссар Исландия тIисса чIирисса паччахIлугъ, цурда чIирисса духьурчагу, чIан куртIсса. Муния къабавсса, къакIулсса бакъахьунссар. КIуллив зун микку циксса халкь яхъанай буссарив? Яхъанай уссар 350 азара инсан. Яни лакраяр цахъи ххишаласса! Му паччахIлугърай итабакьайсса миллатрал кказитрай рищайссар тIар гьарцагу ивкIусса инсаннал суратгу, мунахсса жижарагу. Укунмагу къахъунмасса цала миллатрал дянивату ца инсан уттигу чан хьуну ушиву аьлтту баншиврул, цаннал ца буруччиншиврул, цаннай ца аьтIий, цаннах ца ччаву дуну ялапар хъананшиврул.
Ва ссайн бувцуну нанисса затри учирча, бувцуну наниссар гава гиккун, гара къювулийн.
ХIакьину хIасул хьусса иш-тагьар вания тихуннайгу укуннасса кьяйдалий дачирча, «Илчи» кказит чIал къавхьуну кIура баенсса ххай буру жижарарттал кказитрайн. Яру бунан му къачIалайгу бакъахьунссар.
Коронавирусрал цIуцIаву сававну ттинин, яни ца шин ва дачIиннул дянив, ливтIуцири лакрал ххалли-ххаллилсса инсантурал цIарду кIицI дулларча, кказитрал ца лажин диял къахьунссар.
Амма, яла хъунмур къащи ссал дур учирча, ливтIуминнацIун дархIумунияр, литIун бацIлацIиминнацIун дархIусса дур.
ХIакьину, медициналул бур чинсса специалистътурал тIимунийн бувну, ва инфекциялул цIуцIаврин дармансса дарув дунияллий ттигу ляхъан бувну бакъар. БивкIулул хъапа ххисса му цIуцIаву дайщун дан шайсса чаран бур анжагъ ца – вакцинация! Аммарив, чув буциригу щялусса ва щялмахъсса лайсал хавардайнгу бигьанма вих хъанай, ттигу-шилагу биялсса инсантал бур му дармандалия махъаллил хъанахъисса. Яртал, жула бакIрачIан циксса бучIан аьркинссар жува бакIрай бацIаншиврул. ИвкIуманах алхIам буккингума гьан хъанай бакъару жува. Миннатрича, бизияра, насияра ххалаххи бан, зулагу, зула циринналгу оьрмурду ххассал бансса !

Гульшан Хасаева
Сиражуттин Илиясов
Ссапарбаг Аьбдуллаев
Шалласу Шалласуев
Сулайман Маммаев
Кьубатай Масуев
Аьвдурашид МахIаммадов
Юсуп МахIаммадов
Артур Исрапилов
Руслан Башаев