Ттигъанну «Дагестанская правда» кказитрал редакциялий хьунни журналистурал ПаччахIлугърал Аьрасатнал премиялул лауреат (2020 шин) ва Аьрасатнал Федерациялул ХIукуматрал кIийла лауреат (2016 ва 2018 шинну) Сяъдуллагь Абакаровлущалсса хьунабакьаву, цувгу сакин дурсса Информациялул ва печатьрал министерствалул.

Зулайхат Тахакьаева
Хьунабакьаврий ялагу гьур­тту хьунни «Дагестанская правда» кказитрал хъунмур редактор Бурлият Токболатовагу.
Хьунабакьаву, тIигу-тIир­тIуну, дачин дурну ия информациялул ва печатьрал министр УмархIусман ХIажиев.
Хьунабакьаврийн бавтIми хъамаличунащал кIулгу бувну, УмархIусман ХIажиевлул кIицI лавгунни Сяъдуллагь Абакаровлул цIа машгьурну душиву, так ца жула билаятрай дакъасса, дазул кьатIувгу. ЧIурчIав дурунни ванал цалла ватандалущал­сса дахIаву тачIав руцан къаритайшиву. ПаччахIлугърал премия барчагу дурну, чIа увкунни Сяъдуллагь Ибрагьимовичлун цIуллушиву ва тIайлабацIу.
ДакIнийн бутанну, РАН-далул академик Сяъдуллагь Абакаровлун ПаччахIлугърал премия дуллуссар элмулул ва технологиярттал аралуву. Муния буслай, Сяъдуллагь Абакаровлул кIицI лавгунни ларайсса наградалун цувагу, цала уртакьтал Евгений Чойнзонов ва Игорь Решетов лайкь хьушиву бакIрал ва ссурссулул дурухлурду хъин давриву дурсса ххалдигьавурттахлу.
 Билаятрал лараймур премиялун лайкь хьусса даврил ккаккан бувну бур хьхьичIва ва азарданул литIлай бивкIсса инсантурал оьрмурду 95 процентрал лахъи бан ххал диргьусса кьяйдардал чIярусса шиннардий­сса хIасиллу тIайлабацIусса хьушиву. 
Бурлият Токболатовал дакI­нийн дуртунни Сяъдуллагь Аба­каровлущал цилла дурну диркIсса интервью, 1993 шинал ванал Москавлий докторшиврул диссертация дурурччусса ппурттуву. КIицI лавгунни тани цуппа пахрулий чичлай бивкIшиву цIуну хьусса элмулул докторная, тай аьратталсса шиннардий Москавлий жула ватанлувтурал дуллай диркIсса къача-къучшивуртту сававну щяв дагьсса Дагъусттаннал цIа гьаз дан­сса хьхьичIунсса аьлимтал бушиву ккаккан бан.
Танива ванал бувсун бур хъин дан къашайсса цала захIматсса цIуцIаврия – аьзизсса буттал улк­лул неххал щинахсса ва ххурххулухсса, Хасавюрт шагьрулийсса ца зивулийсса къатрахсса ли­къаххайсса мякьлия. ХIакьину, зувира шин ларгун махъгу, ванал кIицI ларгунни цала хъин къашай азар.
Иш мукун бухьурча, къаччивав, Дагъусттаннайн зана хьуну, вила ватанлувтал шийхва ватандалий хъин буллан куну, цIувххукун, Сяъдуллагь Абакаровлул кIицI лавгунни Москавлий цащава ватанлувтуран ххишала кумаг бан бюхълай бушиву.
«На ххуйну ура академиктурал, лажин ва ххинчурду даххана даврил элмулул гьану бивзсса лавайсса даражалул пишакартурал дянив. Пахрулий ва талихIрай ура ттула лагма-ялтту аьзиз­сса Дагъусттан федерал даражалий лайкьну ккаккан буллали­сса мачча-гъанми, ватанлувтал, дустал, гьалмахтал бушиврия», – увкунни аьлимчунал.
Кьуниясса шиннардий цува каялувшиву дуллалисса факультетрал ва кафедралул коллективрая буслай, кIицI лавгунни цинявппагу цала каялувшиндаралуми цачIун дуллай бушиву цащара тайннаву тарбия дан бювхъусса хасиятру – даврил ялувсса жаваблувшинна, захIмат ххирашиву ва цала каялувчинахсса хIурмат. Мукун бушиву тасттикь буллай бур профессор паччахIлугърал цимирагу премиялун лайкь хьуну ушиврул. Мугу ванал ккалли буллай ур цинявппагу цала гьалмахтурал даврин бивщусса кьиматран.
Сяъдуллагь Абакаров увну ур 1953 шинал ЦIуссалакрал райондалул Чаравали шяраву Хъун дяъвилул гьурттучинал кулпатраву. Школа къуртал бувну бур Хасаврай.
1975 шинал Дагъусттаннал паччахIлугърал мединститутрал стоматологиялул факультет къуртал бувну, увххун ур аспирантуралувун. 1984 шинал мугу къуртал бувну, дурурччуну дур кандидатнал диссертация.
1985 шиная шихунай Сяъдуллагь Абакаров зий ур РАНМО (Российская Академия непрерывного медицинского образования — ДПО РМАНПО) ФГБОУ-лул ортопедиялул стоматологиялул кафедралий, хьхьичI – ассистентну, яла – профессорну. 1993 шинал медициналул элмурдал докторнал диссертациягу дурурччуну, ивтун ур отделданул каялувчину.
2000 шинал увчIуну ур РАЕН-далул академикну. Лайкь хьуну ур Аьрасатнал Федерациялул цIуллу-сагъшиву дуруччаврил министрнал грамоталун ва «Отличник здравоохранения» тIисса хъазамрай лачIай лишандалун. Ва шиная хIакьинусса кьининин Сяъдуллагь Абакаров зий ур РМАНПО-лул стоматологиялул факультетрал деканну.
 Профессорнал элмийсса ва педагогикалул опыт бур 35 шин, миннува 25 – ортопедиялул стоматологиялул кафедралул хъунаману.
Ва ур автор «Современные конструкции зубных протезов» тIисса медициналул вузирдал студентътурансса учебникрал. Ванал итадаркьуну дур 593 элмийсса даву, 14 монография (вайннува 6 хъинчулий ккавккун бусса бур Аьрасатнал КIулшиву дулаврил ва элмулул министерствалул кIулшиву хьхьичIуннай даврил федерал институтрал), 44 дуккаврил пособие ва методикалул маслихIатру, 37 изобретение.
Дагъусттаннаясса профе­ссорнал каялувшиндаралу дурурччуну дур 20 докторнал ва кандидатнал диссертация.
Ва ур А.И. Евдокимовлул цIа­нийсса Москавуллал па­ччахI­лугърал медико-сто­мато­логический университетрал Диссер­тацион советрал член, «Стоматология», «Клиническая стоматология», «Российский вестник дентальной имплантологии» журналлал редколлегиялул член. Мукуна ва ур РАН-далул ва Аьрасатнал Росздравнадзорданул эксперт.
ХIакьину профессор Абакаров ур федерал лагрулул элмийсса интеллигенциялул ца яргсса вакил, лажиндарал ва ххинчурдал хирургиялул ва протезру баврил ца яла хьхьичIунсса пишакар, Аьрасатнал ца яла хьхьичIунма ккарччал хIакин.
Хьунабакьаврил ахирданий УмархIусман ХIажиевлул хъамаличунан пишкаш бувунни «Дагестан» луттирду итабакьай идаралул итабавкьусса Амин ва Камил Чутуевхъал суратирттал чIюлу бувсса Дагъусттаннал тарихрая­сса мукьва том.