ДГМУ-луву тIивтIунни COVID-19 цIуцIаврия вакцина буллансса кIива ххисса пункт ттигу.

КIилчинмур пункт тIивтIуну бур Дагъусттаннал па­ччахI­лугърал медициналул уни­верситетраву. Пункт бивхьуну бур (Имам Шамиллул кIичIира, № 44 ) Реабили­тациялул центрдануву, вакцинациялун аьркинсса гьарца шартIругу дузал дурну.

Вакцинация дуллай шикку зий бур МахIачкъалаллал 6-мур поликлиникалул зузалт, гьарца хамис ва нюжмаркьинирдай. Вакцинация даврил даву анавар дуккан дан кабакьу буллай бур Дагъусттаннал паччахIлугърал медициналул университетрал волонтертал, агьалинал дянив вакциналул мюнпатрая буслай.
Пунктрай волонтертурал хьунабакьлай бур ххалаххи бан бувкIми, буслай бур вайннахь вакциналул хайр-мюнпатрая, дачIлай бур маскарду ва катIри, тIайла буклай бур кабинетирттавун. Цайрасса жаваблувшинна дурчIлай, кумаг буллай бур волонтертал хIакинтуран коронавирусрал цIуцIаврищал талан.

«ЦIубутIуй ттун ччай бия цимурца ттула яруннин кка­ккан: вакцинация цукун най дурив, вакциналия хIакинтурал бусласимуния кIул бан, шиккун букIлакIиминнал тIутIимуних вичIидишин, вакцина бувминнал хIал ккаккан. ХIакьину на нава бував вакцина, ттул чурххал хIал ххуйну бур», – буслай бур волонтертуравасса ца.
Шамилчинмур пункт тIивтIуну бур Дагъус­ттаннал паччахIлугърал медициналул университетрал 3-мур общежитиялуву (Рустамовлул цIанийсса кIичIира, № 1).
ЦIусса пункт тIитIин багьну бур МахIачкъала шагьрулул хъунмур майданний бивхьусса пунктрайн вакцина бан чIявусса халкь занай бушиврийн бувну.
Вакцина буллай байбишин цуксса хIадурну бурив пункт ххал бан бувкIун бия Дагъусттан Республикалул цIуллу-сагъшиву дуруччаврил министр Татьяна Беляева, ванил хъиривчу Мазай Рамазанов, ДГМУ-рал ректорнал буржру биттур буллали­сса Наида Моллаева, проректор Сиядат Идрисова.
ЦIусса пунктрай прививка дан кьинилун кьамул уллан тIий ур ххюцIала инсан.

Шикку буллай бур жула билаятрал итабавкьусса шанмагу журалул вакцина: «Спутник V», «КовиВак» и «ЭпиВакКорона».
Ттигъанну Дагъусттаннайн бувкIун бур вакцина кIива ххалаххи байсса «Спутник V» (кIилчинмур ххалаххи буллай бур шанна нюжмардува) ва «КовиВак» (кIилчинмур ххалаххи буллай бур кIира нюжмардува). КIилчинмур ххалаххи бан гьантлул хьхьичI баян буллай бур Госуслугалий.

ЦIусса пунктрай дурурччуну дур эпидемиологиялул мюхчаншиврул гьарца тIалавшиннарду. Бивхьуну бур вакцина ябансса морозильник, дур диял хьунуксса СИЗ-ру, дуллай бур хасъсса разметка. Ккаккан бувну бур хасъсса кабинетру: ирглий бацIансса ва документру дузал бансса, хIакиннал ххал увайсса ва вакцина байсса.
Дагъусттаннал паччахI­лугърал медициналул университетрал вакцинациялул пункт дузал бувну бур хIакинтуран кумаг буллансса волонтёртуралгу.

Пункт зий байбивхьунни итникьини, июль зурул 19-нний. ЦIусса пунктрай вакцина бан учIан бюхъантIий бур цумацагу му бан ччисса инсаннаща ва шиккун гъансса идарарттал зузалтраща.
ДакIнийн бутанну, Дагъусттаннай коронавирусрал инфекциялия буруччинсса вакцина бувну бур 180 азаруннийн бивсса инсантурал. Вайннава 120 азаруннал бувну бур «Спутник V».
Вай гьантрай республикалийн бувкIун бур 13 050 доза «Гам-КОВИД-Вак» («Спутник V») вакциналул. ЧIал къавхьуну бучIан тIий бусса бур уттигу.