Дагъусттаннал чIумуйнусса БакIчи Сергей Меликовлул каялувшиндарайну хьусса, ччуччиялул-энергетикалул комплекс­рал масъалартталсса буллалисса группалул ва ЖКХ-лул объектру кIинттулнин хIадур буллалисса республикалул штабрал цачIусса заседаниялий ххал диргьунни ттукIрал, газрал тагьар.

Ва совещаниялий, Республикалул ХIукуматрал хъунама АьбдулпаттахI Амирханов акъагу, гьуртту хьунни видеоконференциялул кьяйдалий Аьрасатнал энергетикалул министрнал хъиривчу Павел Сниккарс, СКФО-лул социал-экономикалул къайгъурдал департаментрал директор Игорь Храновский, «Россети» ПАО-лул гендиректорнал хъиривчу Даниил Краинский. Республикалул хъунаманал кIицI лавгунни ЖКХ-лул ва ччуччиялул-энергетикалул комплекс республикалий лащинсса даражалий бушиву ва уттива кIинттулнин хIадур хъанан багьлай бушиву, ларгсса шиналсса диялдакъашивурттугу хIисавравун ларсун. Меликовлул кIицI лавгунни республикалий электросетьру ва подстанциярду 70 процентрал дух хьуну душиву, миннувух кьарал къадурурччуну бувсса объектругу бухьувкун, ттукI бацлацисса кIанттурду бушиву, электросетирдал комлекс цIу буккан буван багьлай бушиву. ТтукI биял къахъанай МахIачкъалалив ва Каспийскалий чани лешлай бушиврий чIурчIав дунни. Бувсунни кIинттул, газ биял къахъанай, агьали гъилишиврия махIрумну ливчIсса тагьаргу диркIшиву. Укун, ттукI ччя-ччяни лешлай, газ кьукьлай, азурда буллалисса инсантурал чIумуй ттукIрах, газрах багьа къабуллай бушиврий аьй дуван­сса кIану чIалай бакъашиву, багьа тIалав булланнин даву сантирайн рутан аьркиншиву. ЖКХ-лул ва энергетикалул министр Ризван Мурадовлул бувсунни инвентаризациялул ялун личин дуршиву диялдакъашивуртту хIисавравун лавсун, ми ччяни духлаган дувансса кьасттирай зий бушиву. МахIачкъалаллал мэр Салман Дадаевлул бувсунни шагьрулул энергосетирдал хозяйство мяйжаннугу дух хьуну душиву, так июнь зурул 15-нния байбивхьуну, июль зурул 12-ннийн бияннин шагьрулул диспетчертурал къуллугърайн 64 аьрза бувкIшиву, миннуватугу 24 азарва аьрза ттукI бакъашиврул ялувсса. «Чан-кьанну гьавалул тагьар даххана хьуннихха, чани лешлай бур шагьрулуву, анжагъ ва махъсса зурул дянивгума подстанциярдай шанна хъунисса авария хьунни, кIива гьантлий агьали ттукI бакъа личIан бунни. Шагьрулул администрациялул зузалт шаймур буллай зий бивкIунни, амма шагьрулул ттукIралсса буллалисса «Россети Северный Кавказ» – «Дагэнерго» идаралул цайвасса бурж-бигарду багьайкун биттур къабуллалиссаксса, тагьар къулай къахьунтIиссар»,– увкунни Дадаевлул. Республикалул хъунаманал, шагьрулул мэрнацIун авкьуну, тапшур бунни ва иширал хъирив лаян республикалул прокуратуралий. Республика газрал дузал дуваврил давурттая балжину бувсунни ООО «Газпром газораспределение Дагестан» идаралул директор Ризван ГъазимахIаммадовлул.