Сулакьуллал каньондалий хьунтIиссар арт-симпозиум

Июльданул 15-нния 21-ннин Сулакьуллал каньондалий хьунтIиссар Дунияллул халкьуннал дянивсса цалчинсса арт-симпозиум «Каньон». Муний гьуртту хьун жулла республикалийн бучIантIиссар Аьрасатнал личIи-личIисса регионнаясса, гъанмур ва архмур дазул кьатIатусса художниктал.

Арт-симпозиумрал гьурттучитуран аьркинну дур авторсса давуртту щаллу дуван ва миннувасса кIира даву цIуну буллалисса Дагъусттаннал ттизаманнул искусствалул фондравун дулун. Вай давурттал выставка шадлугърал тагьарданий МахIачкъалалив тIитIинтIиссар сентябрьданул 1-нний, Москавлив – сентябрьданул 15-нний.

Арт-симпозиумрал лагрулий хьунтIиссар личIи-личIисса давуртту: воркшопру, мастер-классру, перфомансру, ттизаманнул искусствалиясса лекцияртту.
Арт-симпозиумрал давривух гьуртту хьунтIиссар суратрищултгу, му майдан мукунма ишла бувантIиссар документал фильмру ласуншиврулгу.

Вай гьантрай республикалул хъамаллурал неъмат ласунтIиссар яру ххари буллалисса, дунияллий яла куртIминнувасса цаннин ккаллисса Сулакьуллал каньондалул ххуйшивурттая, ххал бувантIиссар жулла республикалул цайми-цаймигу кIанттурду, кIул хьунтIиссар зунттал билаятрал багьу-бизулущал, культуралущал.
Арт-симпозиум, гьарца шинал дуллай, аьдатравун дутансса пикри бур, гьурттучитурал географиягу, ккалгу ялу-ялун хъунна дуллай.