«Магнит» ттучанну жучIавагу тIитIинтIиссар

Санкт-Петербург шагьрулий дунияллул халкьуннал дянив­сса Экономикалул форумрай Дагъусттан Республикалул БакIчинал буржру чIумуйну биттур буллалисса Сергей Меликов хьунаавкьунни «Магнит» компаниялул вакилтуращал. Вайннал дянивсса ихтилатгу хьунни Дагъусттаннай цалчинсса «Магнит» ттучанну тIитIавриясса.

Мукун, июль зурул байби­­хьулий Каспийскалий тIитIин­тIиссар «У дома» ва «Магнит Косметик» лагрулул кIива ттучан. Ми бикIантIиссар цIусса микрорайондалийсса Молодежная кIичIираву. Ца – 400 кв.м., вамургу – 240 кв.м. дусса. Вайннул хъиривмур «Магнит» ттучан тIитIинсса пикри бур МахIачкъалалив август зуруй.
Вай бикIантIиссар гьарцагу чулуха ляваличIийсса ттучанну: муштаритурал тIалавшиннарду щаллу даврия байбивхьуну, къулайсса, рахIатсса интерьерданийн, «гъалгъа тIутIисса вывескардайн» бияннин.

Санкт-Петербурграй хьусса хьунабакьаврий мукунма ххал бивгьунни жулла региондалий хъус итадакьлакьиминнащал­сса уртакьшиврийсса зузаврийн багьайсса масъаларттугу. «Магнит» компаниялул дайдирхьуну дур ми поставщиктуращал цачIусса даву ва дурну дур цалчинсса икьраллу. Мисалдаран, региондалул брендирттал Миллатрал цалчинсса «Вкусы Ро­ссии» тIисса конкурсрай халкьуннал буллусса чIурдал ккал хIисавну ххув хьусса «Дагестанская баранина» тIисса брендращал. ХIакьинусса кьининин компаниялул ва журалул 11 икьрал чирчуну дур жулла республикалийсса дикIул, аьнакIул, бакалеялул, хIачIиялул, ччатIул ва кондитер сурсатирттал поставщиктуращал.

Компаниялул планнаву бур ххюра шинал мутталий жулла региондалий 180-ннийн бив­сса «Магнит» журалул ттучанну тIитIинсса. Ва иширайну ххи хьунтIиссар 2000 цIусса зузи кIану.
Уттинин ва компаниялул ттучанну тIивтIуссар Аьрасатнаву 3770 кIанай.