Уттигъанну жулла республикалул 7 вузрал командарттал дянив хьунни «самые веселые и находчивые» цIанил ялувсса бяст-ччал – КВН-лул Дагъусттаннал лигалул 1/4 финал. Гьарцагу цачIундур команда хIарачат буллай дия хасну цивппа му цIанин лайкьшиву ккаккан буван: ДГУ, ДГУНХ, ДГМУ, ДАГГАУ, ДГТУ ва КВН-лул команда «Сушняк».

Ва шадлугъ сакин дурну дия ДР-лул Жагьилтурал иширттал министерствалул.
Бяст-ччал байбивхьуна, цIакь хьусса аьдатрайн бувну, «Приветствие» конкурсрая. КВН-лул жюрилуву бия «Скала» тIисса паралимпий клубрал президент Карим Шехсаидов, режиссер Камил Аьлиев, КВН-лул «Пирамида Владикавказ» командалул гьурттучи Алан Зангиев, Дагъусттаннал цачIундур командалул КВН-лул лаваймур лигалул финалистътал Аьли Аьлиев ва Мурад Макьсудов.
Жюрилул дурсса хIасиллайн бувну, КВН-лул Дагъусттаннал лигалул 1/4 финалданий ххув хьунни 2 команда: ДГУ-лул цачIундур команда ва команда «Сушняк».

– Асарду бур кIибачIин къашайсса. Финалданий ххув шаву – му командалул, жагьилтурал бувсса хъунмасса захIматри. Яла-яла тIааьнну бия жюрилул члентуравасса цанная – Аьли Аьлиевлуя вузрал цачIундур командалия цIарду дуллалисса махъру баян, – тIий ур ДГУ-лул цачIундур командалул каялувчи, КВН-лул «Сборная Дагестана» командалул гьурттучи, жула лакку оьрчI (ш. Читтур) Шамил Шабанов.