Июньдалул 8-нний МахIачкъалаллал социал обслуживаниялул центрданий хьунни цала
зузалтрал байран барча дуллалисса хъуннасса шадлугъ.
[dropcap]В[/dropcap]а пишакаршиврул байран жула билаятрай кIицI лагайссар 2000 шиная шиннай. Жулла республикалий кумаг аьркинсса инсантуран кумаг буллай, бугьараминнал, мушакъатсса инсантурал чIарах бацIайсса къуллугъирттал социал аралуву зий уссар 11 азара зузала. Вай хъанахъиссар бугьарасса халкь ялапар хъанахъисса идарарттал, реабилитациялул центрдал, приютирттал ва инсантал давурттал дузал бай центрдал зузалт.
Республикалул каялувчитурал цIанияту хъуннасса ва агьамсса даву дуллалисса социал аралул пишакартал барча бан шадлугърайн увкIун ия ДР-лул ХIукуматрал Председательнал хъиривчу Мурад Казиев.
[dropcap]П[/dropcap]ишакаршиврул байрандалущал барчагу бувну, ванал кIицI лавгуна дукIу пандемиялул чIумал ДР-лул ЗахIматрал министерствалул сакиншиндарайну ахIвал-хIал кIюласса, мушакъатсса инсантал бусса кулпатирттан, оьрмулул бугьараминнан дуки-хIачIиялул кьуцуртту батIлатIисса центр сакин бувну бивкIшиву, ми кьуцуртту кумаграх мюхтажминначIан биян буллай, вайннал зузалтрал хъуннасса даву щурущи дурну диркIшиву. Аьмну 237 азарва кулпат дузал бувну бур дагъусттанлувтал цачIун хьуну бувсса кумаграцIух.
ДР-лул ЗахIматрал министерствалул чулуха хIурматрал грамотартту ва бахшишру дуллунни, ххуйну, дакI марцIну зузисса, личIи-личIисса шагьрурдаясса ва районнаясса цала зузалтран.
