Бугьарами паракьатну яхъананшиврул жагьилминнал аякьа аьркинссар

Вай гьантрай оьрмулул бугьараминнансса ва инвалидтурансса «Ветеран» тIисса Къатлувун-интернатрайн бивунни «Аьра­сатнал ниттихъул» суккушиндарал Дагъусттаннайсса отделениялул активистътал. Вайннащал бивзунни Исламрал бизнесрал Дунияллул халкьуннал дянивсса ассоциациялул, Каспийск шагьрулул депутатътурал мажлисрал, ДГУ-лул культуралул факультетрал кафедралул, Каспийск шагьрулул КЦСОН-лул вакилтал, балайчи Зульфия Илиясова. Ва акция иширайну щаллу дуван ка кIидархIунни «Олива» супермаркетрал, «Эльсам» машлул къатлул, «Десерто» кондитерский къатлул, МахIачкъалаливсса «Оптик-ситилул» заллухъруннал.


Ва оьрмулул бугьараминна­чIансса цалчинсса аьрххи бакъар вайннал.
– ДакI дувансса, хъинсса махъ учаву, оьрмулул хъуниминнал дакIниймуних вичIидишаву, ахIвал-хIалдания цIуххаву – ва жущара дуван бюхъайсса хъун дакъасса давур.

ДакI кIидачIинмур, бусанмур мудангу бусса, ляличIийсса, багьа бищун къашайсса опытрал ва аькьилшиврул бувцIусса цалва-цалва оьрмулул кьадарду, цалва-цалва тарих бусса бугьараминнан цири дусса цахарасса къулагъасраяр хьхьичIунсса. Шиккун нанийни жу мудангу вайннан цинявннан ца лавхьхьусса ссайгъатру ласару – щинчIав къаччан къабикIаншиврул, – буслай бур «Аьрасатнал ниттихъул» суккушиндарал Дагъусттаннайсса отделениялул председатель Таиса МахIаммадова.

– Барчаллагь учин ччай бур цал кIяла чIарардал, так оьрмулул диялсса шиннардия бакъа­ссагу, куртIсса аькьилшиврия ва оьрмулул опытраягу бусласисса инсантурахь. Зу мудангу аякьалулун, хIурматралун лавсун личIаннав, – увкуна ДГУ-лул культуралул факультетрал библиотековедениялул ва библиографиялул кафедралул профе­ссор Нина Аджаматовал.

Мукунма ихтилатру бувна Каспийскаллал Ф. Аьлиевал цIанийсса ЦБС-лул директор, шагьрулул депутат Мадина Темировал, КЦСОН-лул зузала Мадина МахIаммадовал.
Оьрмулул хъуними цалва балайрдайну ххари бувна Зульфия Илиясовал ва Зугьра Мажидовал.
Ахирданий оьрмулул бугьараминнал цалва ва ми ялапар хъанахъисса къатлул директор Мажид Мирзаевлул барчаллагь увкуна хъамаллурахь.