Щаллагу дунияллий июньдалул 1-нний кIицI лагайсса ОьрчIру буруччаврил кьини, гьарца шинал кунна, яргсса оьрчIан ва миннал нитти-буттан хIаз дизансса шадлугъирттайну хьунадаркьунни МахIачкъалалив.

Ва кьини кIюрххилла Расул ХIамзатовлул цIанийсса проспектрай най дия оьрчIансса шадлугъру. Оьруснал театрданул хьхьичIсса майданнив тIурча, хьунни Республикалул оьрчIал художествалул творчествалул ХI «ЧIава зунтталчувтал» фестиваль. Ва хьунни Республикалул Халкьуннал творчествалул къатлул сакиншиндарайну, МахIачкъала шагьрулул администрациялул ва Культуралул управлениялул гьурттушиндарайну.

Шадлугърал гьурттучиталну ва кьини бия Аьхьхьахъиял, Къаяккантуллал, Къумтуркъалаллал, ЦIуссалакрал, Нугъайнал районнаясса, МахIачкъала, Дарбант, Дагестанские Огни, Кизилюрт, Избербаш шагьрурдаясса оьрчIал коллективру ва цивппалусса чIава балайчитал.

Мува майданнив хьунни Республикалул выставкагу, оьрчIал дирхьусса суратрал «Ттул Ххувшаву» цIанилусса арт-площадкагу. Суратру дишин гьунарду ва гъира-гьавас буминнал шадлугърай гьуртту хьуна чIава художниктал ва М. Жамаллул цIанийсса Художествалул училищалул, Дизайнрал, экономикалул ва правалул техникумрал студентътал. Ччима оьрчIаща ва кьини бюхълай бия личIи-личIисса мастер-классирттавух, жанавартрал ва лелуххантрал куцру карунних варсул янналия кьукьлакьисса хIазсса давривух, асфальтрай сурат дишавривух гьуртту хьун.