ОьрчIал симаннай пиш чан къахьуннав!

Центрданул хIаятраву ва идаралул цила каялувшиврулун лавсъсса кулпатирттавасса ва цIуллу-сагъшиврул чулуха ссуссукьусса 80-ксса оьрчIан хIадур дурну дия яргсса концерт.

Шадлугъ тIитIлай, оьрчIру барча буллалисса махъ лавхъуна Центрданул каялувчи Зиявуттин БахIарчиевлул. ОьрчIан цIуллушиву ва талихIсса оьрму чIа увкуна мукунма махъру лавхъсса цайми-цайминналгу. ОьрчIал тяхъашиву ххишала хьун дуллай бия магьравасса костюмирттавасса артисталгу, аниматорталгу, Дагъусттаннал эстрадалул балайчитал ва къавтIалтгу.

Яла-яла оьрчIан ххуй дирзуна аниматортуращал цачIусса къавтIаву. Ва шадлугърал сакиншинна дурну дия ДР-лул Халхьуннал Мажлисрал депутатнал кумагчи ва ОНФ-лул эксперт МахIаммад Мусаевлул ва «Аура» тIисса ресторандалул заллу НурмахIаммад Шяъбановлул.

Шадлугърал ахирданий циняв оьрчIайх нацIу-кьацIулущалсса кьуцурттугу бавчIуну, цинявннал цачIусса суратругу рирщуну, хъуннасса къавтIаву дуруна.

Читайте также: