Вирус ппив хьун къаритансса чаран так ца вакцина бавривур дусса!

Июнь зурул 1-нний Дагъусттаннал паччахIлугърал педагогикалул университетраву тIивтIунни коронавирусрая буруччаву мурадрайсса вакцинарду буллансса чIумуйнусса мобильный пункт.

Акция сакин бувну бия ДР-лул ЦIуллушиву дуруччаврил ва Дагъусттаннал жагьилтурал иширттал министерствардал ДГПУ-рал медициналул ва физиологиялул, анатомиялул кафедралущал цачIуну. Официальныйну сияхIрайн лавсъсса шанмагу вакциналува язи бувгьуну, шикку буллай бур «КовиВак» препарат.

CОVID-19 буруччинсса цIусса препарат ахттар бувну бур М.П. Чумаковлул цIанийсса иммуннобиологиялул препаратру ахттар буллалисса федерал элмийсса центрданий.
Жагьилтурал иширттал министрнал хъиривчу ПатIимат Оьмаровал кIицI лавгунни ОьрчIру буруччаврил кьини агьали коронавирусрая мюхчан баву мурадрай тIивтIусса пункт, му агьамсса ва савав дусса иш хъанахъишиву.

– Учитель – му ур цалла хъунмур чIун оьрчIащал гьан дуллалисса инсан. Мунийн бувну, хIакьину Дагъусттаннал паччахIлугърал педагогикалул университетраву тIивтIусса мобильный пунктрай вакцинартту бунни сайки цинявппа зузалтрал. Вайннан бувчIлай бур, билаятрайх дацIан дан къахъанай, ппив хъанай нанисса оьсса цIуцIаврия буруччиншиврул, цаяра цуксса хъуннасса жаваблувшиву дуссарив, цивппагу, оьрчIругу, цала лагма-ялттумигу муния буруччиншиврул», – тIий, буслай бур ПатIимат Оьмарова.

«Ттул пикрилий, жува цинявннал анаварсса мутталий вакцинарду барчан бакъа, ва оьсса цIуцIаврия ххассал хьунсса чаран цамур чIалай бакъар. Вакцинартту баврийнур коллективраву вирус ппив хьун къаритан тIисса, – тIий ур ва кьини вакцина бувсса тарихрал факультетрал декан Закир Мирзаев.
Шиккува бусан, ДГПУ-луву тIивтIусса мобильный пунктрай COVID-19-райн къарщисса прививкартту дансса ихтияр дуссар педагогтурахь, студентътурахь дакъассагу, ччима инсаннахь, увкIун дансса.