КIива яргсса иш хьунни цалархIал Дагъусттаннал паччахIлугърал Cсихьрал театрдануву ОьрчIру буруччаврил кьини – БРИКС-рал билаятирттал ссихьрал театрдал дунияллул халкьуннал дянивсса кIилчинмур фестиваль лакьлакьисса шадлугъ ва Ссихьрал театрданун 80 шин хъанахъисса юбилей.
«Креатив» тIисса литературалул клубрал буккулт, «Камерата» тIисса оьрчIал ансамбльданул солистал, Дагъуттаннал опералул ва балетрал театрданул артисталгу гьурттусса яргсса ва авадансса программа ккаккан дурунни Ссихьрал театрданул хъамаллуран.
Ва хъуннасса байрандалий хъамалу бия Астрахань, Белгород, Волгоград, Вологда, Воронеж, Киров, Мытищи ва Рязань шагьрурдаясса ссихьрал театрду.
Республикалул творчествалул ккурандалул ва цила цIания театрданул коллектив барча бунни Дагъусттаннал культуралул министр Зарема Буттаевал. БРИКС-рал билаятирттал фестиваль лайкьсса даражалий тIайла дуккаврихлу барчаллагь тIий, ванил увкунни:
«ДакIнийхтуну барчаллагьрай бура фестиваль лавайсса даражалий хIадур дан гьурттушинна дурсса цумацаннахьгу. Фестивальданул авадансса программалул цинявппа ххари бунни так цала постановкарттайну бакъасса, цайми проектирдайнугу: хIаз бизансса хьунабакьавурттайну, мюнпат бусса мастер-классирттайну, ва «Театр – зеркало эпохи» тIисса ккаккиялийну, цувгу хIадур дурсса Дагъусттаннал Ссихьрал театрданул Бахрушиннул цIанийсса театрал музейращал ва Дагъусттаннал театрдал тарихрал музейращал цачIуну».
Ссихьрал театрданул цIасса юбилей кIицI лаглай, министрнал чIурчIав дурунни Дагъусттаннал Ссихьрал театрданул творческий коллектив цIакьну ликкурттай бавцIуну бушиву Аьрасатнал ва дунияллул халкьуннал дянивсса культуралул майданний ва лайкьсса даражалий ккаккан дуллай бушиву мунил жула республика дазул кьатIув.
«Цуппа зузисса цимирагу ацIра шинал лажиндарай Ссихьрал театр итталун багьссар цимирагу никирал, ми чIавасса оьрмулува байбивхьуну хъуни хьуннин цащала архIал бувцун най.
Ссихьрал театр бивкIссар ва личIантIиссар дакIру ясир дуллалисса магьрайну ва ссихIирсса персонажирттал сипатирттай жуйнма хъиншиврийн оьвтIутIисса жула дусну. Ссихьрал театр ххирану бур, хIурматрай бур!
Юбилейрал кьини, на зуйн дакIнийхтуну барчаллагьрай бура, зул захIматрахлу, яргсса гьунардахлу ва магьиршиврухлу. ТIайлабацIу баннав зун, жул ххирасса ссихьрий!
ЧIатIий бура зун тамашачитурал дазу дакъасса ччаву ва ххувшавуртту!» – увкунни министрнал.
Юбилей барча дуллалисса ихтилатру бунни билаятрал регионнал ва Дагъусттаннал миллатирттал театрдал каялувчитурал.
Хъамалу бувкIсса театрдал каялувчитал кIицI лаглай бия фестивальданул ларайсса сакиншинна. Мунил программалул тIайлабацIу гьуртту хъанахъиминнал пикрилийн бувну бусса бия афиша авадансса душивруву.|
Байрандалул ахирданий фестивальданул хъунмур сакиншинначинал, Дагъусттаннал ссихьрал театрданул директор Аминат ЯхIияевал, барчаллагь увкунни уртакьтурахь, чIа увкунни цIу-цIусса проектру чулийн буккан бансса тIайлабацIу.
«Барчаллагьрай бура зуйн, зула ишругу кьабивтун, ттул ва ттул коллективрал ххаришиву кIидачIин бучIаврихлу. Барчаллагь зула ляличIисса, тикрал къашайсса пикрийрдайну жул фестивальданул чIарав бацIан бучIаврихлу, жун ссихьрал театрданул караматсса дуниял пишкаш даврихлу.
Жу ххариссару хIакьину жула юбилейрал шадлугърай зу ккаккан. Зунгу, зул кулпатирттангу чIатIий бура ххуй-хъиншивуртту! Жула ххирасса Ссихьрал театрдахь тIий бура – Виват!
Ххарисса дахханашивурттал мурчал тIитIин баннав жула ятIул жамирду, хIайран булланнав жува, магьирлугърахсса ччаврил ясир дуваннав жула дакIру!» – увкунни Аминат ЯхIияевал.
Театрданул коллективрахь юбилей барча дурунни Дагъусттаннал театрал ишккаккултрал Союзрал хъунама Айгум Айгумовлул, театрал критик, культуролог, литературалул тарихчи, публицист, искусствоведениялул кандидат, филологиялул элмурдал доктор Капиталина Кокшеневал, режиссер, Аьрасатнал магьирлугърал бусравсса ишккакку, «НИКИНДОМ» театрданул каялувчи Вероника Косенковал, Аьрасатнал драматургтурал Гильдиялул хъунама Олег Ломовцевлул.
Байран къуртал хьуна «Тысяча и одна ночь» магьлувасса «Синдбад-мореход» спектакль ккаккан баврийну.
